سۋ تاسقىنى: ماڭعىستاۋدان اتىراۋعا ارنايى تەحنيكالار جونەلتىلدى
اقتاۋ. KAZINFORM - ماڭعىستاۋ وبلىسىنان اتىراۋ وڭىرىندە سۋ تاسقىنىنىڭ الدىن الۋعا كومەك رەتىندە ارنايى تەحنيكالار جىبەرىلدى.
وبلىس اكىمدىگىنىڭ ۇيىمداستىرۋىمەن اتىراۋ قالاسىندا سۋ تاسقىنىنا دايىندىق جۇمىستارىن كۇشەيتۋ ماقساتىندا ماڭعىستاۋ وڭىرىندەگى بىرنەشە كومپانيا كومەك رەتىندە اۋىر تەحنيكالاردى جىبەردى.
ونىڭ ىشىندە «اليانس ل ت د» كومپانياسى مەن «قاراجانباس مۇناي» ا ق، «گاتين» ءارقايسىسى 1 ەكسكاۆاتور، 1 جۇك تيەگىش، «وڭداسىن ستروي» - 1 ەكسكاۆاتور، «اقتاۋ تەڭىز پورتى» - 2 جۇك تيەگىش، «اس-قۇرىلىس» مەكەمەسى 1 اۆتوبۋستى اتالعان وڭىرگە جونەلتتى.
«اتىراۋلىقتارعا قولداۋ كورسەتۋ - ءبارىمىزدىڭ ازاماتتىق مىندەتىمىز. كولىكتەردى باسقاراتىن جۇمىسشىلارىمىزعا دا زور جاۋاپكەرشىلىك ارتىلىپ وتىر. باستىسى - قاۋىپسىزدىك تالاپتارىن ساقتاپ، قاجەتتى كومەك كورسەتىلەتىنىنە سەنەمىن»، - دەدى «قاراجانباس مۇناي» ا ق باس ديرەكتورى مارات ەلەۋسىنوۆ.
اتالعان ارنايى تەحنيكالار سۋ تاسقىنان زارداپ شەككەن جانە ءالى دە قاۋىپ ءتونىپ تۇرعان ەلدى مەكەندەرگە بوگەت سالۋ جانە نىعايتۋ جۇمىستارىنا جۇمىلدىرىلادى.
وسىعان دەيىن جاڭاوزەن قالاسىنان ارنايى تەحنيكالاردان قۇرالعان كومەك بريگاداسى قۇلسارىعا اتتانعان بولاتىن. سونداي-اق قۇلسارىدان كوشىرىلگەن تۇرعىندار اقتاۋدا 17 نىسانعا ۋاقىتشا ورنالاستى.
