سۋ تاسقىنى كەزەڭى: قازاقستان رەسەي جانە قىتايدان اقپارات الىپ وتىرادى
استانا. KAZINFORM - سۋ تاسقىنى كەزەڭىندە قازاقستان كورشىلەس رەسەي جانە قىتاي ەلدەرىمەن ءوزارا اقپارات الماسىپ وتىرادى. بۇل تۋرالى Kazinform ساۋالىنا ق ر سۋ رەسۋرستارى جانە يرريگاتسيا مينيسترلىگىنىڭ رەسمي جاۋابىندا ايتىلدى.

- قازاقستان نەگىزگى ترانسشەكارالىق وزەندەردىڭ (ەرتىس، ىلە، شۋ، تالاس، سىرداريا، جايىق) تومەنگى اعىسىندا ورنالاسقان ەل رەتىندە سۋمەن قامتاماسىز ەتۋ ماسەلەلەرىندە كورشى ەلدەرگە تاۋەلدى. سوندىقتان كورشى ەلدەرمەن ءوزارا ءتيىمدى ىنتىماقتاستىقتى دامىتۋ نەگىزگى فاكتور بولىپ تابىلادى. بۇگىنگى كۇنى ترانسشەكارالىق وزەندەر سالاسىنداعى بارلىق ىرگەلەس ەلدەرمەن جۇمىس ىستەپ تۇرعان بىرلەسكەن كوميسسيالار مەن جۇمىس توپتارى شەڭبەرىندە سۋ ديپلوماتياسى جالعاسۋدا، - دەلىنگەن حابارلامادا.
سونداي-اق ۆەدومستۆو قازىرگى كەزدە رەسەي جانە قىتاي ەلدەرىمەن سۋ تاسقىنى كەزىندەگى ءىس-ارەكەت كەلىسىلگەنىن ايتادى.
- سۋ ديپلوماتياسى سۋ تاسقىنى كەزىندە دە، سۋارۋ ماۋسىمى كەزىندە دە ماڭىزدى. قازىر ول جوعارى دەڭگەيدە دەپ ايتا الامىز جانە كورشى ەلدەرمەن كەلىسسوزدەر بويىنشا قيىندىقتار جوق. سۋ تاسقىنى كەزەڭىن وتكىزۋ بويىنشا ءوزارا ءىس-قيمىل جونىندەگى قازاقستان-رەسەي بىرلەسكەن جۇمىس توبى قۇرىلدى. قازىر جۇمىس توبىنىڭ قۇرامى، ەرەجەسى جانە 2025-جىلعا ارنالعان جۇمىس جوسپارى بەكىتىلدى. ياعني، قازاقستان مەن رەسەي سۋ تاسقىنى كەزەڭىندە اقپارات الماسۋعا كەلىستى. قىتايمەن دە سۋ تاسقىنى كەزىندەگى جۇمىس ەكى جاقتى كەلىسىم ارقىلى جۇزەگە اسادى، - دەلىنگەن جاۋاپتا.
ودان بولەك قىرعىزستان سۋ تاسقىنى كەزەڭىندە تالاس وزەنى ارقىلى سۋ بەرۋ كولەمى ۇلعايتاتىنىن مالىمدەگەن بولاتىن. بۇل شارا كيروۆ سۋ قويماسىنان سۋ جىبەرۋدى رەتتەۋ جانە سۋ تاسقىنى كەزەڭىندە اپاتتىڭ الدىن الۋ ماقساتىندا جاسالادى.
ب ۇ ۇ- نىڭ مالىمەتىنشە، الەم حالقىنىڭ 40 پروتسەنتى ترانسشەكارالىق وزەن-كولدەردىڭ ماڭىنا قونىستانعان، ونىڭ تەك بەستەن ءبىر بولىگىندە عانا سۋ رەسۋرسىن بىرلەسە پايدالانۋ بويىنشا كەلىسىم بار.
وسى ورايدا ورتالىق ازيادا ترانسشەكارالىق وزەندەر ماسەلەسى قالاي شەشىلىپ جاتقانى تۋرالى كولەمدى ماتەريال جاريالاعان ەدىك.