سۋ تاسقىنى: Forbes تىزىمىندەگى داۋلەتتىلەر مەن ءىرى كومپانيالار 100 ميلليارد تەڭگە ءبولدى
استانا. KAZINFORM - قازاقستاندىق ميللياردەرلەر مەملەكەت باسشىسى قاسىم-جومارت توقايەۆتىڭ ۇندەۋىنە قۇلاپ اسىپ، سۋ تاسقىنىنان زارداپ شەككەندەرگە كومەك، قولداۋ رەتىندە ءىرى كولەمدە قارجى ءبولدى.
ەسكە سالا كەتەيىك، پرەزيدەنت Forbes تىزىمىنە كىرەتىن ءىرى كاسىپكەرلەر ءار وبلىسقا، اۋدانعا، ەلدى مەكەنگە بەكىتىلەتىنى تۋرالى ايتقان ەدى. ماقسات - سۋ تاسقىنى زاردابىنا ۇشىراعان جاندارعا ناقتى قول ۇشىن سوزۋ.
وسى ورايدا Kazinform اگەنتتىگى تاسقىن سۋ سالدارىن جويۋعا Forbes تىزىمىندەگى باي-ماناپتاردان كىمدەر تارتىلۋى مۇمكىن ەكەندىگىنە شولۋ جاسادى.
ەندى سوزدەن ىسكە كوشكەن باي-قۋاتتىلارعا كەلسەك، تيمۋر قۇلىبايەۆ اتىراۋ وبلىسىنا كومەك رەتىندە 30 ميلليارد تەڭگە بولەدى. قاراجات تۇرعىن ءۇي سالۋعا جانە جوندەۋ جۇمىستارىنا، ينفراقۇرىلىمدىق وبەكتىلەردى قالپىنا كەلتىرۋگە، سونداي-اق سۋ تاسقىنىنان زارداپ شەككەن حالىقتى قولداۋعا جۇمسالادى.
«سۋ تاسقىنىنان زارداپ شەككەن ادامدارعا جاناشىرلىق تانىتامىن. العاشقى كۇننەن باستاپ ءبىز سۋ باسقان وڭىرلەرگە كومەك كورسەتىپ كەلەمىز. پرەزيدەنت قاسىم-جومارت توقايەۆتىڭ باسشىلىعىمەن بارلىق قيىندىقتى بىرگە جەڭەتىنىمىزگە سەنىمدىمىن»، - دەدى تيمۋر قۇلىبايەۆ.
سونداي-اق، قازاقمىس، KAZ Minerals، التىنالماس، قاراجىرا جانە RBK Bank كومپانيالار توبى سۋ تاسقىنىنان زارداپ شەككەن قازاقستاندىقتارعا كومەك كورسەتۋ ءۇشىن قوسىمشا 40 ميلليارد تەڭگە بولەدى. بولىنگەن قاراجات ينفراقۇرىلىمدى قالپىنا كەلتىرۋگە جانە الەۋمەتتىك وبەكتىلەردى، ياعني بالاباقشالار، مەكتەپتەر، اۋرۋحانالار، سونداي-اق تۇرعىن ۇيلەر سالۋعا باعىتتالادى.
ال، Kaspi.kz- ءتىڭ تەڭ قۇرىلتايشىلارى ۆياچەسلاۆ كيم مەن ميحايل لومتادزە سولتۇستىك قازاقستان جانە اقمولا وبلىستارىنا 20 ميلليارد تەڭگە اۋدارادى. اقشا وڭىرلەردى قالپىنا كەلتىرۋگە، سونداي-اق جاڭا تۇرعىن ءۇي سالۋعا جۇمسالادى.
«زارداپ شەككەن ايماقتاردا ءبىزدىڭ كليەنتتەر، سەرىكتەستەر مەن قىزمەتكەرلەر تۇرادى. ءبىز سۋ تاسقىنىنىڭ العاشقى كۇنىنەن باستاپ ولارمەن ۇنەمى بايلانىستامىز جانە جاعدايمەن تانىسپىز. Kaspi.kz موبيلدى قوسىمشاسىندا قايىرىمدىلىق قور جيناۋدى ۇيىمداستىرىپ، «Biz birgemiz Qazaqstan» قورىنا قۇتقارۋ تەحنيكاسىن، امۋنيتسيانى، جانار-جاعار ماي جانە باسقا دا العاشقى كومەكتى ساتىپ الۋعا قاراجات ءبولىندى. وكىنىشكە قاراي، جاعداي ءبىرقاتار ايماقتا جاعداي ءالى دە قيىن. ءبىز پرەزيدەنتتىڭ باستاماسىن قولداۋدى جانە وسى قيىن ساتتە ەلگە پايدالى بولۋدى ازاماتتىق مىندەتىمىز دەپ سانايمىز»، - دەدى ميحايل لومتادزە.
بولات وتەمۇراتوۆ اقتوبە وبلىسىنىڭ تۇرعىندارىنا قولداۋ كورسەتىپ، 10 ميلليارد تەڭگە ءبولدى. قارجى جاڭا تۇرعىن ۇيلەر سالۋعا جۇمسالادى.
«سۋ باسقان وڭىرلەردەگى توتەنشە جاعدايدى قايعىرا قاداعالاپ وتىرامىن. اپاتتىڭ اۋقىمى ءوسىپ بارادى، ادامدارعا شۇعىل كومەك قاجەت. ءبىز بارلىق كۇش-جىگەرمەن جانە قولدا بار رەسۋرستارمەن قامتاماسىز ەتۋدى جالعاستىرامىز. پرەزيدەنت قيىنشىلىققا تاپ بولعان مىڭداعان وتانداسىمىز ءۇشىن قاۋىپسىزدىك پەن ەرتەڭگى كۇنگە دەگەن سەنىمدىلىكتىڭ كەپىلى بولا وتىرىپ، الدىڭعى قاتاردا تۇر جانە مەملەكەت باسشىسىنىڭ شەشىمدەرى ءارقاشان ءبىزدىڭ تاراپىمىزدان قولداۋعا يە بولادى»، - دەدى بولات وتەمۇراتوۆ.
