سۋ تاسقىنى بولعان ايماقتارداعى ادامداردىڭ كەشىكتىرىلگەن كرەديتىنە ءوسىمپۇل جۇرە مە
استانا. KAZINFORM - سۋ تاسقىنى بولعان ايماقتارداعى ادامداردىڭ كەشىكتىرىلگەن كرەديتىنە ءوسىمپۇل جۇرە مە؟ قارجى مينيسترلىگىنىڭ باسپا ءسوز قىزمەتى وسى ساۋال مازالاعان تۇرعىندارعا جاۋاپ بەردى.
«بۇگىنگى كۇنى سۋ تاسقىنىنان زارداپ شەككەن جانە رەسپۋبليكالىق بيۋدجەتتەن بەرىلگەن بيۋدجەتتىك كرەديتتەردى العان قارىز الۋشىلار نەسيە بەرۋشى تاراپىنان قولداۋ شارالارىنا سەنىم ارتا الادى.
قازاقستان رەسپۋبليكاسىنىڭ بيۋدجەت زاڭناماسىنا سايكەس توتەنشە جاعداي قولدانىلاتىن كەزەڭدە قارىز الۋشىنىڭ بيۋدجەتتىك كرەديت بويىنشا بەرەشەگى (مەرزىمى وتكەن بەرەشەگى) پايدا بولعان كەزدە كرەديتوردىڭ ءوسىمپۇل ەسەپتەۋى مەرزىمى وتكەن بەرەشەك پايدا بولعان كۇننەن باستاپ كۇنتىزبەلىك 90 كۇن ىشىندە جۇزەگە اسىرىلمايدى.
كرەديتتىك شارتتىڭ ەرەجەلەرىندە توتەنشە سيپاتتاعى وقيعالار (مىسالى، جەر سىلكىنىسى، سۋ تاسقىنى جانە ت. ب. ) ناتيجەسىندە بيۋدجەتتىك كرەديتتەردى وتەۋ مەن سىياقى تولەۋدى كەيىنگە قالدىرۋ جونىندەگى نورما كوزدەلگەن.
بيۋدجەتتىك كرەديتتەردى وتەۋ بويىنشا مىندەتتەمەلەردى ورىنداماۋدىڭ وسىنداي تاۋەكەلى تۋىنداعان جاعدايدا قارىز الۋشىلار نەگىزدەمەسىن (ت ج رەجيمىندەگى ءوڭىر اكىمىنىڭ قاۋلىسى جانە ت. ب. ) قوسا بەرە وتىرىپ، جەرگىلىكتى اۋقىمداعى ت ج جاريالانعان كۇننەن باستاپ ءوسىمپۇل ەسەپتەۋدى توقتاتا تۇرۋ تۋرالى ءوتىنىش بەرە الادى» دەلىنگەن حابارلامادا.
مۇنداي قادامدار قارىز الۋشىلارعا تابيعي اپاتتاردان تۋىندايتىن قارجىلىق قيىندىقتاردى ەڭسەرۋگە جانە سۋ تاسقىنىنان كەلتىرىلگەن زالالدى قالپىنا كەلتىرۋگە كومەكتەسەدى.
