سۋ تاسقىنى باستالعالى 113 مىڭ ادام ەۆاكۋاتسيالاندى
استانا. KAZINFORM – ق ر ت ج م ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش ەلدەگى سۋ تاسقىنى بويىنشا جاڭا دەرەكتەردى باياندادى.
سۋ تاسقىنى باستالعالى بەرى بارلىعى 113867 ادام، ونىڭ ىشىندە 39943 بالا قۇتقارىلىپ، ەۆاكۋاتسيالاندى، 112539 مال قاۋىپسىز جەرگە ايدالدى. وسى ساعاتتا 15125 ادام ءوز ۇيلەرىنە ورالدى. 6704 ادام، ونىڭ ىشىندە 3052 بالا ەۆاكۋاتسيالاۋ پۋنكتتەرىندە جاتىر.
«اقتوبە، قوستاناي، اقمولا، اتىراۋ، سولتۇستىك قازاقستان وبلىستارىندا 5732 جەكە تۇرعىن ءۇي، 1579 اۋلا اۋماعى جانە 2035 ساياجاي ۇيلەرى سۋ استىندا قالۋدا. 3570 تۇرعىن ءۇي مەن 2225 اۋلا اۋماعىنان سۋدىڭ باعىتى بۇرىلدى»، - دەدى ە. سايپاش رەسپۋبليكالىق اقپاراتتىق شتابتا وتكەن بريفينگىدە.
سۋ تاسقىنى سالدارىن جويۋ، سۋ تاسقىنىنا قارسى ءىس-شارالار مەن اۆاريالىق-قۇتقارۋ جۇمىستارى جالعاسۋدا. 9,7 ميلليون استام تەكشە مەتر ەرىگەن قار سۋى سورىپ شىعارىلدى، 2,4 ميلليون قاپشىق جانە 1,2 ميلليون استام توننا ينەرتتى ماتەريال توسەلدى.
اۆاريالىق قۇتقارۋ جانە سۋ تاسقىنىنا قارسى جۇمىستارعا 33391 ادام، 4470 تەحنيكا، 890 سۋ سورۋ قۇرالى، 392 ءجۇزۋ قۇرالى، 18 اۋە كەمەسى جۇمىلدىرىلعان. ت ج م پسيحولوگتارى جەرگىلىكتى جەرلەردە جانە جەدەل جەلى تەلەفوندارى ارقىلى ازاماتتارعا شۇعىل پسيحولوگيالىق كومەك كورسەتۋدى جالعاستىرۋدا. جەدەل جەلىگە تۇسكەن 1816 قوڭىراۋ پىسىقتالدى.
