سۋ تاسقىنى. اتباساردا 200 جانۇيانى كوشىرۋگە بولىنگەن 300 ميلليون تەڭگە قاراجات قولدى بولعان
استانا. KAZINFORM - سۋ تاسقىنىنا قارسى شارالارعا بولىنگەن قاراجاتتى ۇرلاعان قاراقشىلار قىلمىستىق جاۋاپكەرشىلىككە تارتىلدى، دەپ حابارلايدى اقمولا وبلىسى پروكۋراتۋراسىنىڭ باسپا ءسوز قىزمەتى.
اقمولا وبلىسىنىڭ ارنايى پروكۋرورلارى 300 ميلليون تەڭگەدەن استام قاراجاتتى جىمقىرعانى ءۇشىن اتباسار اۋدانىنىڭ اكىمدىگىنە قاراستى قۇرىلىس ءبولىمى، «پرەستيج ستروي 7» جانە «فۋندامەنتال» ج ش س- ءنىڭ باسشىلارىنا قاتىستى سوتقا دەيىنگى تەرگەپ- تەكسەرۋدى اياقتادى.
- اتالعان قاراجات 2021 -جىلى ۇكىمەت رەزەرۆىنەن اتباسار اۋدانىندا سۋ تاسقىنى ايماعىندا تۇراتىن 200 جانۇيانى كوشىرۋ ءۇشىن ەكى 100 پاتەرلى ۇيلەردى سالۋعا بولىنگەن. كۇدىكتىلەردىڭ ارەكەتتەرى اسا ءىرى كولەمدە جىمقىرۋ - تالان- تاراجعا سالۋ، ياعني قازاقستان رەسپۋبليكاسى قىلمىستىق كودەكسىنىڭ 189-بابى 4-بولىگى بويىنشا سارالاندى. كورسەتىلگەن باپ بويىنشا مۇلكىن تاركىلەۋمەن قوسا، 12 جىلعا دەيىن باس بوستاندىعىنان ايىرۋ جازاسى كوزدەلگەن. ەكى كۇدىكتى سوت سانكتسياسىمەن كۇزەتپەن ۇستالسا، ولاردىڭ ءۇشىنشى سەرىكتەسى ءۇيقاماققا الىندى، - دەلىنگەن ۆەدومستۆو حابارلاماسىندا.
تەرگەۋ بارىسىندا الماتى، استانا قالالارىندا قىلمىستىق جولمەن الىنعان كوممەرتسيالىق جىلجىمايتىن مۇلىك، ارنايى تەحنيكا، قۇرىلىس قۇرىلعىلارى انىقتالدى، سونداي- اق بانكتىك شوتتاردا 50 ميلليون تەڭگەدەن استام اقشالاي قاراجات تابىلدى. بۇل رەتتە تىيىم سالىنعان مۇلىكتىڭ قۇنى 335 ميلليون تەڭگەدەن اسا سوماعا باعالاندى. پروكۋرورلار اتالعان مۇلىكتىڭ ءبىر بولىگى جالعا بەرىلىپ، قىلمىستىق جولمەن پايدا تۇسىرىلگەنىن انىقتادى. سول سەبەپتى، ءبىر كۇدىكتىنىڭ ارەكەتى قىلمىستىق جولمەن الىنعان اقشانى جانە وزگە مۇلىكتى زاڭداستىرۋ (جىلىستاتۋ)، ياعني قازاقستان رەسپۋبليكاسى قىلمىستىق كودەكسىنىڭ 218-بابى 3-بولىگى بويىنشا قوسىمشا سارالاندى. بۇل باپ بويىنشا مۇلكىن تاركىلەۋمەن قوسا، 10 جىلعا دەيىن باس بوستاندىعىنان ايىرۋ جازاسى كوزدەلگەن.
قازىر قىلمىستىق پروتسەسكە قاتىسۋشىلار قىلمىستىق ءىس ماتەريالدارىمەن تانىسىپ جاتىر. سوڭعى نۇكتەنى ءىس بويىنشا سوت قوياتىن بولادى.
بۇعان دەيىن پرەزيدەنت اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا كوكتەمگى سۋ تاسقىنىنان زارداپ شەككەن 17 مىڭنان استام وتباسىنىڭ باسپانا ماسەلەسى شەشىلگەنىن حابارلادى.
