سۋ تاسقىنى: اقتوبەدە مال شىعىنى وتەلىپ جاتىر

су тасқыны
Фото: ТЖМ

 اقتوبە. KAZINFORM - اقتوبەدە ەسەپ بويىنشا 3232 باس مال قىرىلدى. قازىر 677 باس مالعا 89,1 ميلليون تەڭگە اۋدارىلدى.

وڭىردە توتەنشە جاعدايلاردىڭ الدىن الۋ جانە ولاردى جويۋ كوميسسياسى جۇمىس ىستەپ جاتىر. شىعىندى ەسەپتەۋمەن قاتار وتەۋ دە قولعا الىنعان.

- الدىمەن مالدىڭ قۇنى انىقتالادى. ول ءۇشىن ستاتيستيكا دەپارتامەنتىنىڭ اۋداندىق فيليال وكىلدەرى مالدىڭ جاس ەرەكشەلىگىنە بايلانىستى نارىقتىق باعانى ايتادى. بۇل دەرەك ولاردا بولادى. سول دەرەككە سايكەس مالدىڭ وتەماقىسى انىقتالادى. اۋدانداعى توتەنشە جاعدايلاردىڭ الدىن الۋ جانە ولاردى جويۋ كوميسسياسى اكتى جاساپ، شەشىم شىعارعان سوڭ قارجى اۋدارىلىپ جاتىر. قازىر 677 باس مال يەسىنە 89,1 ميلليون تەڭگە قارجى اۋدارىلدى. جۇمىس جالعاسادى،- دەدى اقتوبە وبلىستىق اۋىل شارۋاشىلىعى جانە جەر قاتىناستارى باسقارماسى باسشىسىنىڭ ورىنباسارى رۇستەم وتەش.

ايتا كەتەيىك، سۋ تاسقىنى كەزىندە قىرىلعان مال وتەماقىسىن تولەۋدىڭ الگوريتمى بار. ول ءۇشىن ولەكسەسى، سىرعاسى بولۋى كەرەك. ءارى اۋىل شارۋاشىلىعى بازاسىندا تىركەلگەنى راستالادى.

ەسكە سالساق، اقتوبە وبلىسى اكىمدىگى مال شىعىنىن وتەۋ ءۇشىن رەسپۋبليكالىق بيۋدجەتتەن 2,2 ميلليارد تەڭگە سۇرادى.

سوڭعى جاڭالىقتار