سۋ تاسقىنى: اقتوبەدە 3 مىڭعا جۋىق مال قىرىلدى

Фото: ТЖД баспасөз қызметі
Фото: ТЖД баспасөз қызметі

اقتوبە. KAZINFORM - قازىرگى كەزدە 3 مىڭعا جۋىق مالدىڭ تاسقىنعا شىداس بەرمەي سۋمەن قوسا اعىپ كەتكەنى، سونىمەن بىرگە سۋدا قالعانى انىقتالىپ وتىر. وڭىردە شىعىندى وتەۋ تەتىگى قاراستىرىلىپ جاتىر.

اقتوبە وبلىسى اۋىل شارۋاشىلىعى جانە جەر قاتىناستارى باسقارماسى قازىر مال شىعىنىن تىركەپ جاتىر. ازىرگە 3 مىڭ باسقا جۋىق ءتورت تۇلىك تىزىمگە الىندى.

- كۇن سايىن اۋدانداردان جەدەل مالىمەت جيناقتاپ وتىرمىز. بۇگىندە 3 مىڭعا جۋىق مالدىڭ ولگەنى انىقتالدى. ولار سۋعا اعىپ كەتكەن، كەيبىرى سۋدا قالعان. تارقاتىپ ايتار بولساق، 300 گە جۋىق جىلقى، 600 باسقا جۋىق ءىرى قارا، 2 مىڭنان استام ۇساق مال، 7 تۇيە بار. كوبىنە ويىل جانە قوبدا اۋداندارىندا كوپ تىركەلدى. دەگەنمەن بايعانين، ىرعىز اۋداندارىندا دا بار. بۇل سيفر الداعى كۇندەرى ناقتىلانادى. سونىمەن بىرگە مالشىلاردىڭ ءۇيى، قوراسىنىڭ قۇلاۋ دەرەكتەرى دە جيناستىرىلىپ جاتىر، - دەدى اقتوبە وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ءبولىم باسشىسى پانابەك بيمۇراتوۆ.

ونىڭ ايتۋىنشا، قازىر اۋدان، اۋىلداعى مال دارىگەرلەرى ءۇي-ءۇيدى، شارۋاشىلىقتاردى ارالاپ، تىركەۋ جۇمىستارىن جۇرگىزىپ جاتىر. دەگەنمەن كەيبىر شارۋاشىلىقتارعا بارار جول جوق، سۋ قايتپاعان.

- وبلىس اكىمى شىعىندى جەرگىلىكتى بيۋدجەت ەسەبىنەن دە قاراستىراتىنىن مالىمدەدى. قازىر تىركەپ، ناقتىلاپ، قۇجاتتارى جينالادى. كەيىن سول مالدىڭ بازارداعى ورتاشا قۇنى انىقتالىپ، شىعىن وتەلەدى. بۇل ءبىر ەمەس، بىرنەشە ايدا شەشىلەتىن جۇمىس. ال دەرەكتەر كۇن سايىن جاڭارتىلىپ، ق ر اۋىل شارۋاشىلىعى مينيسترلىگىنە جىبەرىلىپ وتىر. شارۋالاردىڭ نەسيەسى، سۋبسيدياعا العان تەحنيكاسىنا قاتىستى سۇراقتاردى شەشۋ جولى دا قاراستىرىلادى. ازىرگە قارجى ينستيتۋتتارىنا حابار بەرىلدى، - دەدى پانابەك بيمۇراتوۆ.

سوڭعى جاڭالىقتار