سۋ تاسقىنى: 85 مىڭعا جۋىق ادام ەۆاكۋاتسيالاندى

استانا. KAZINFORM - سۋ تاسقىنىنا ۇشىراعان وڭىرلەردەگى بۇگىنگى جاعداي بويىنشا جەدەل اقپارات تاراتىلدى.

«9-ساۋىردەگى ساعات 10:00-دەگى جاعداي بويىنشا، ازاماتتىق قورعاۋ قىزمەتىنىڭ كۇشىمەن 85 مىڭعا جۋىق ادام، ونىڭ ىشىندە 30 مىڭعا جۋىق بالا ەۆاكۋاتسيالاندى. قازىر ۋاقىتشا ورنالاستىرۋ پۋنكتتەرىندە 8349 ادام، ونىڭ اراسىندا 3809 بالا بار. توتەنشە جاعدايلار مينيسترلىگى جانە جەرگىلىكتى اتقارشۋى ورگانداردىڭ كۇشىمەن 8 ميلليوننان استام تەكشە مەتر ەرىگەن قار سۋى سورىلدى. سونىمەن قوسا 1 مىڭنان استام قۇم قاپشىق جانە 1 توننادان استام ينەرتتى ماتەريالدار توسەلدى. اۆاريالىق قۇتقارۋ جۇمىستارىنا 16 مىڭنان استام جانە 2500 گە جۋىق تەحنيكا جۇمىلدىرىلدى»، - دەدى توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ت ج م وكىلىنىڭ ايتۋىنشا، ەلىمىزدىڭ 9 وڭىرىندە (اقتوبە، قوستاناي، ب ق و، ۇلىتاۋ، اقمولا، قاراعاندى، اتىراۋ، پاۆلودار جانە س ق و) جەرگىلىكتى اۋقىمداعى 29 توتەنشە جاعداي جاريالاندى.

«جەدەل جەلى تەلەفوندارىنا 1129 قوڭىراۋ كەلىپ ءتۇستى جانە 76 ادامعا شۇعىل پسيحولوگيالىق كومەك كورسەتىلدى. 20 وڭىردە رەسپۋبليكالىق جانە وبلىستىق جەدەل شتابتار جۇمىسىن جالعاستىرۋدا»، - دەيدى سپيكەر.

ايتا كەتسەك، ىشكى ىستەر مينيسترلىگى سۋ باسقان وڭىرلەردە ستراتەگيالىق وبەكتىلەر قورعاۋىنا الدى.