سۋ تاسقىنى: 38 مىڭنان استام تۇرعىن ۇيىنە قايتا ورالدى

استانا. KAZINFORM - ەلىمىزدە سۋ تاسقىنىنان زارداپ شەككەن 38254 ادام ءوز ۇيلەرىنە ورالدى، 6727 ادام ەۆاكۋاتسيالاۋ پۋنكتتەرىندە قالىپ وتىر. بۇل تۋرالى ق ر ت ج م وكىلى اسقار ءشارىپ باياندادى.

ونىڭ ايتۋىنشا، استانا قالاسىنان، تۇركىستان جانە قوستاناي وبلىستارىنان سولتۇستىك قازاقستان وبلىسىنا كومەككە بارعان توتەنشە جاعدايلار مينيسترلىگى كۇشتەرى مەن قۇرالدارىنىڭ ءبىر بولىگى تۇراقتى ورنالاسۋ ورىندارىنا قايتارىلىپ جاتىر. ازاماتتىق قورعاۋ قىزمەتتەرى اتىراۋ، اقتوبە، اقمولا، باتىس جانە سولتۇستىك قازاقستان وبلىستارىنا سۋ تاسقىنىنا قارسى ءىس-شارالار، سالداردى جويۋ جانە حالىققا كومەك كورسەتۋ جۇمىستارى جالعاسىن تاۋىپ جاتىر.

«سۋ تاسقىنى باستاعالى بەرى 12,8 ميلليون استام تەكشە مەتر ەرىگەن قار سۋى سورىپ شىعارىلدى، 6,6 ميلليون استام قاپشىق جانە 1,5 ميلليون استام توننا ينەرتتى ماتەريال توسەلدى. اتىراۋ وبلىسىندا جايىق وزەنى سۋ دەڭگەيىنە مونيتورينگ جالعاسۋدا. بوگەتتەردى نىعايتۋ جۇمىستارى جۇرگىزىلىپ جاتىر. وتكەن تاۋلىكتە يندەر، ماحامبەت، يساتاي، قۇرمانعازى اۋداندارىندا 500 مىڭ قاپشىق، 1510 توننا ينەرتتى ماتەريال توسەلدى. قۇلساپرى قالاسىندا سۋ باسقان اۋماقتان 196055 تەكشە مەتر سۋ سورىلدى»، - دەدى ا. ءشارىپ ورتالىق كوممۋنيكاتسيالار قىزمەتىندە.

اۆاريالىق- قۇتقارۋ جانە سۋ تاسقىنىنا قارسى جۇمىستارعا 20309 ادام، 2783 تەحنيكا، 584 سۋ سورۋ جانە ءجۇزۋ قۇرالى، 8 اۋە كەمەسى جۇمىلدىرىلعان.

اقتوبە، باتىس قازاقستان، اقمولا، اتىراۋ، سولتۇستىك قازاقستان وبلىستارىنىڭ ت ج دەپارتامەنتتەرىندە جەدەل جەلى تەلەفوندارى قىزمەت كورسەتىپ جاتىر. جەدەل جەلى تەلەفوندارىنا 2250 قوڭىراۋ ءتۇستى.

ەۆاكۋاتسيالىق پۋنكتتەردە توتەنشە جاعدايلار دەپارتامەنتتەرىنىڭ، ت ج م اپاتتار مەديتسيناسى ورتالىعىنىڭ پسيحولوگتارى مەن مەديتسينالىق قىزمەتكەرلەرى ازاماتتارمەن جۇمىس جۇرگىزۋدى توقتاتقان جوق.

اۆتور
ايجان سەرىكجان قىزى