سۋ تاسقىنى: اقتوبە قالاسىندا 136 وتباسىنا ءۇي ساتىپ الىندى
اقتوبە. KAZINFORM - اقتوبە قالاسىندا سۋ تاسقىنى كەزىندە باسپاناسىنان ايىرىلعان 136 وتباسىنا پاتەر ساتىپ الىندى. قازىرگى كەزدە تاعى 60-قا جۋىق وتباسىنا باسپانا الۋ جۇمىسى ءجۇرىپ جاتىر.
سۋ تاسقىنى كەزىندە اقتوبە قالاسى بويىنشا 3500-دەن استام وتباسى زارداپ شەكتى. تەحنيكالىق تەكسەرۋ، باعالاۋ جۇمىستارى كەزىندە 190 ءۇي جارامسىز دەپ تانىلعان. قازىرگى كەزدە ولاردىڭ 136 ى جاڭا پاتەرگە قونىستاندى. اقتوبە قالاسى اكىمىنىڭ باسپا ءسوز قىزمەتىنىڭ حابارلاۋىنشا، ءالى دە 60-قا جۋىق وتباسىنا پاتەر ساتىپ الىنادى.
- 2000 -جىلى ىرعىز اۋدانىنان اقتوبە قالاسىنا كوشىپ كەلدىك. سول كەزدە ۋ د ۆ-4 باۋ- باقشا ۇجىمى اۋماعىنان ءۇي الىپ، كەڭەيتىپ، قوسىمشا قۇرىلىس جۇرگىزدىك. ءتورت بولمەلى ءۇي بولاتىن. ۇلىم سوندا ۇيلەندى، قىزىم تۇرمىسقا شىقتى. 2017 -جىلى سۋ تاسقىنى كەزىندە ۇيگە سۋ كىرىپ، كوپ ۇزاماي جوندەپ الدىق. ال بيىل 28-ناۋرىزدا سۋ كوتەرىلدى. ءۇيىمىز ارادا 3 ساعات وتكەندە قۇلادى. ءبىز الدىمەن مەكتەپتەگى ەۆاكۋاتسيالىق بەكەتكە بارىپ، كەيىن كوللەدجدىڭ جاتاقحاناسىنا ورنالاستىق. باسپانامىز تۇگەل قيراپ قالعان سوڭ وسى پاتەردى بەردى. بارىنە العىسىمدى ايتامىن، - دەدى زەينەتكەر باليلا بايقازاقوۆا.
ونىڭ ايتۋىنشا، ەكى بولمەلى پاتەردە بالاسى مەن كەلىنى، ءۇش نەمەرەسى جانە قىزىمەن قوسقاندا 7 جان تۇرادى. قازىرگى كەزدە بالالاردى مەكتەپكە ورنالاستىرۋ، بالاباقشاعا بەرۋ جۇمىستارىن دا تولىق رەتتەگەن.
- كۇيەۋىم تاسىمالداۋ كومپانياسىلدا تەمىر ۇستاسى، ءوزىم ءدارىحانادا قىزمەتكەرمىن. جاڭا پاتەرگە كىرگەن كەزدە ءوزىمنىڭ جۇمىس بەرۋشىم بارلىق جيھازىن الىپ بەردى. سول ءۇشىن دە العىس ايتامىن. قازىرگى كەزدە مەكتەپكە باراتىن ەكى بالانى قىزىلجار ورتا مەكتەبىنە بەرۋدى جوسپارلاپ قويدىق. ال 3 جاستاعى ۇلىم بالاباقشاعا تىركەلدى. ءبارى ءۇشىن العىس ايتامىن، - دەدى اقمارال قايداروۆا.
بۇل وتباسىنا پاتەر اقتوبە قالاسى ەسەت باتىر تۇرعىن الابىنان بەرىلدى.
ايتا كەتەيىك، اقتوبە قالاسىندا ءۇي سالۋ جۇمىسى جۇرگىزىلمەيدى. مۇندا كوپقاباتتى ۇيدەن پاتەر ساتىپ الۋعا ءتۇرلى قور ارقىلى قارجى ءبولىنىپ جاتىر. سونىمەن بىرگە وتباسى بانك پەن وبلىس اكىمدىگى 1,5 ميلليارد تەڭگە ءبولىپ، 100 وتباسىنىڭ باسپانالى بولۋىنا جاعداي جاسايدى.
اۆتور
ەربول جانات
