س ق و: ينتەرنەت الاياقتىقتان تۇرعىندارعا 920 ميلليون تەڭگە شىعىن كەلگەن

  پەتروپاۆل. KAZINFORM -سولتۇستىك قازاقستان وبلىسىندا ينتەرنەت الاياقتىق بارلىق قىلمىستىڭ %22 الىپ وتىر. قولعا الىنعان كەشەندى شارالاردىڭ ناتيجەسىندە پوليتسەيلەر ونى شامالى بولسا دا-%1,2 ازايتا الدى.

س ق و پوليتسيا دەپارتامەنتىنىڭ باستىعى ايدىن قابدۇلدينوۆتىڭ ايتۋىنشا، كيبەرقىلمىس، اسىرەسە سوڭعى ەكى جىلدىڭ ىشىندە كۇرت ارتقان.

«ينتەرنەت تەحنولوگيانى قولدانۋ ارقىلى جاسالعان الاياقتىق فاكتىلەرى كۇندەلىكتى تىركەلەدى. بىلتىر 1017 الاياقتىق جاسالسا، سونىڭ 771 ىندە تۇرعىندار ينتەرنەت ارقىلى الدانىپ قالعان. 920 ميلليون تەڭگەدەن استام شىعىن شەكتى، سونىڭ تەك 37 ميلليون تەڭگەسىن عانا قايتارۋ مۇمكىن بولدى»، - دەيدى ايدىن قابدۇلدينوۆ.

دەپارتامەنت باستىعىنىڭ ايتۋىنشا، مۇنداي قىلمىستاردى اشۋ وتە قيىن. ويتكەنى، ادامدار الدانعانىن كەش تۇسىنەدى، ياعني كەش حابارلاسادى. قىلمىسكەرلەر كوبىنە شەت ەلدە وتىرىپ وزدەرىنىڭ ارام ويلارىن ىسكە اسىرادى.

«الدىن الۋ ءۇشىن قازىر ەڭبەك ۇجىمدارىندا دا كەزدەسۋلەر وتكىزىپ جاتىرمىز. ءتىپتى ءۇيدى-ءۇيدى ارالاپ، ادامدارمەن كەزدەسىپ، اسىرەسە زەينەتكەرلەرمەن سويلەسىپ، قىلمىستىڭ وسى ءتۇرى جايىندا اقپاراتتاندىرامىز، بروشيۋرالار تاراتامىز. بۇل جۇمىسقا ب ا ق وكىلدەرىن، ۆولونتەرلەردى تارتتىق. بىلتىر 825 ادام «102» ارناسىنا تەلەفون شالىپ، وزدەرىنە الاياقتاردىڭ حابارلاسقانىن، ولاردىڭ تالاپتارىن ورىنداماعاندارىن ايتقان. قوعامدىق دامۋ جانە اقپارات مينيسترلىگىنە الاياقتاردىڭ جالعان جارنامالارىن بۇعاتتاۋ ءۇشىن بىلتىر 900 دەن استام سىلتەمە جىبەرىلدى»، - دەيدى ايدىن قابدۇلدينوۆ.

اۆتور

اقەركە داۋرەنبەك قىزى