س ق و- دا سيفرلىق اكتيۆتەردى زاڭسىز اينالىمعا شىعارعان ءۇش ازامات سوتتالدى
استانا. KAZINFORM - ق م ا سولتۇستىك قازاقستان وبلىسى بويىنشا دەپارتامەنتى سيفرلىق اكتيۆتەردى زاڭسىز اينالىمعا شىعارۋ فاكتىسى بويىنشا قىلمىستىق ءىستى تەرگەۋدى اياقتادى.

ءۇش ازامات ءتيىستى ليتسەنزياسىز كريپتوۆاليۋتا قابىلداۋ جانە ايىرباستاۋ وپەراتسيالارىن جۇرگىزگەن. ولار كريپتوۆاليۋتا بيرجالارىنان الىنعان قاراجاتتى پايدالانىپ، كريپتوكوشەلەك ارقىلى قامتاماسىز ەتىلمەگەن تسيفرلىق اكتيۆتەرمەن ايىرباس وپەراتسيالارىن جۇزەگە اسىرعان. قازاقستان رەسپۋبليكاسىنىڭ اۋماعىندا قىزمەتى تىيىم سالىنعان كريپتوبيرجالار ارقىلى جاسالعان بۇل وپەراتسيالار زاڭسىز بولدى.
- زاڭسىز ايىرباس وپەراتسيالارى ناتيجەسىندە سحەمانى ۇيىمداستىرۋشىلار سيفرلىق اكتيۆتەردى ۇلتتىق ۆاليۋتاعا ايىرباستاعان. جالپى اينالىم سوماسى 681 ميلليون تەڭگەدەن استام. 380 ادام وسى ءۇش ازاماتپەن كريپتوۆاليۋتا بويىنشا ترانزاكتسيالار جاساعانى انىقتالدى، بۇل ءىس- ارەكەت بانكتىك شوتتاردان الىنعان ۇزىندىلەرمەن راستالدى، - دەلىنگەن ق م ا- نىڭ حابارلاماسىندا.
سوت ءۇش كۇدىكتىگە قاتىستى شەشىم قابىلداپ، ولاردى 2,5 جىلدان 3,5 جىلعا دەيىن باس بوستاندىعىنان ايىرۋ جازاسىنا كەسىپ، مۇلىكتەرىن تاركىلەۋگە شەشىم قابىلدادى.
قۇنى شامامەن 400 ميلليون تەڭگەنى قۇرايتىن مۇلىك تاركىلەندى، ونىڭ ىشىندە 10 ميلليون تەڭگە كولەمىندە اكتيۆتەر، 150 ميلليون تەڭگە باعاسىنداعى جىلجىمايتىن مۇلىك، جالپى قۇنى 213 ملن تەڭگە بولاتىن بەس كولىك، 12 ميلليون تەڭگە تۇراتىن كۆادروتسيكل جانە قىمبات كومپيۋتەرلىك جابدىقتار بار.
مۇنداي قۇرىلىمدار ءوز كليەنتتەرىن سايكەستەندىرمەيدى جانە كۇدىكتى وپەراتسيالاردى انىقتامايدى. سوندىقتان، ولاردىڭ قىزمەتتەرىن كوبىنە كيبەرالاياقتار مەن ەسىرتكى زاتتارىن وتكىزۋشىلەر پايدالانادى.
مىسالى، وسىنداي سحەمالار ارقىلى 2024 -جىلى 10 ميلليارد تەڭگەگە ەسىرتكى تابىستارى شىعارىلعان.
ايتا كەتەيىك، قازاقستان رەسپۋبليكاسىنىڭ «سيفرلىق اكتيۆتەر تۋرالى» زاڭىنا سايكەس ەلدەگى تسيفرلىق اكتيۆتەردىڭ اينالىمىنا قاتىستى كەز كەلگەن قىزمەت ليتسەنزيانى قاجەت ەتەدى.
ق م ا قوعامداعى زاڭدىلىق پەن ءتارتىپتى قامتاماسىز ەتۋ، ەكونوميكالىق جانە قارجىلىق قۇقىق بۇزۋشىلىقتارعا قارسى ءىس- قيمىل بويىنشا بەلسەندى جۇمىستى جالعاستىرىپ جاتىر.
ەسكە سالا كەتەيك، 2024 - جىلى 42 قارجى پيراميداسى جويىلدى. بۇل تۋرالى قارجىلىق مونيتورينگ اگەنتتىگىنىڭ ءتوراعاسى پرەزيدەنت قابىلداۋىندا بولعاندا حابارلاعان بولاتىن.