سۋ مينيسترلىگى: بيىل دا قىرعىزستاننان كەلەتىن سۋدان تاپشىلىق تۋىنداۋى مۇمكىن
استانا. KAZINFORM - سۋ رەسۋرستارى جانە يرريگاتسيا ۆيتسە-ءمينيسترى ارسەن جاقانبايەۆ ءماجىلىس دەپۋتاتتارىنا بيىل دا قىرعىزستاننان كەلەتىن سۋدان تاپشىلىق تۋىنداۋى مۇمكىن ەكەنىن ءمالىم ەتتى.
«سۋارمالى ەگىنشىلىككە ارنالعان بارلىق سۋ الۋدىڭ 11,1 تەكشە شاقىرىمى الماتى، جەتىسۋ، جامبىل، تۇركىستان، قىزىلوردا وبلىستارىنا تيەسىلى. سۋارۋ الاڭى - 1 ميلليون 250 مىڭ گەكتار. بۇل سۋارۋعا ارنالعان بارلىق سۋ الۋدىڭ 97 پايىزىنا تەڭ. ەل بويىنشا ايتساق، بارلىق سۋارمالى القاپتىڭ 78 پايىزى وسى بەس وبلىستا. ەگىن سۋارۋعا كەتەتىن سۋدىڭ نەگىزگى شىعىنى دا وسى وڭىرلەرگە ءتان»، - دەدى ول ءماجىلىستىڭ اگرارلىق ماسەلەلەر جونىندەگى كوميتەتىنىڭ وتىرىسىندا.
ۆيتسە-مينيستر جاز كەزىندە الماتى، جەتىسۋ، جامبىل وبلىستارىندا ايتارلىقتاي سۋ تاپشىلىعى بولماۋى كەرەك دەپ وتىر. ال تۇركىستان جانە قىزىلوردا وبلىستارىندا كورشى ەلدەردەگى قۋاڭشىلىق سالدارىنان ماسەلە تۋىنداۋى مۇمكىن.
«قىرعىزستاننىڭ توقتاعۇل قويماسىنداعى سۋ كولەمى بىلتىرعىدان 300 ميلليون تەكشە مەتر از. ال ءاندىجاندا سۋ كولەمى بىلتىرعىدان ءسال جوعارى. ال شىرشىق باسسەينىندەگى سۋ كولەمى بىلتىرعىدان 100 ميلليون تەكشە مەترگە از. سۋدىڭ كەلۋ كولەمى از بولۋى دا سودان. بيىل وسى سۋدىڭ از بولۋىنا بايلانىستى پروبلەمالار بولۋ مۇمكىن. وسىعان بايلانىستى اكىمدىكتەرگە تۇركىستان وبلىسىنىڭ ماقتاارال جانە جەتىساي اۋداندارىنداعى «دوستىق» كانالىنىڭ ىلىنگەن الاڭدارىندا كۇرىش ەگۋدى الىپ تاستاۋ، قىزىلوردا وبلىسىندا كۇرىش ەگىسىن قىسقارتۋ ۇسىنىلادى»، - دەدى ارسەن جاقانبايەۆ.
