سۋ باسقان وڭىرلەردە وسى كۇندەرى 325 ءسابي دۇنيەگە كەلگەن
استانا. KAZINFORM - سۋ تاسقىنىنا بايلانىستى توتەنشە جاعداي جاريالانعان وڭىرلەردە 325 بالا دۇنيەگە كەلدى. بۇل تۋرالى دەنساۋلىق ساقتاۋ مينيسترلىگىنىڭ رەسمي وكىلى ايگەرىم ورازاليەۆا ايتتى.
سۋ تاسقىنىنان زارداپ شەككەن وبلىستارداعى مەديتسينالىق ۇيىمدار شتاتتىق رەجيمدە جۇمىس ىستەپ تۇر.
«مەديتسينالىق كومەكتىڭ بارلىق ءتۇرىنىڭ قولجەتىمدىلىگىن قامتاماسىز ەتۋ ءۇشىن جەدەل مەديتسينالىق كومەك قىزمەتتەرىنىڭ، ستاتسيونارلاردىڭ قابىلداۋ پۋنكتەرىنىڭ جانە ەمحانالاردىڭ جۇمىسى كۇشەيتىلدى. ارنايى موبيلدى بريگادالار قۇرىلدى. ولار قاجەت بولعان جاعدايدا ۋاقىتشا ورنالاستىرۋ پۋنكتەرىنە بارادى. جۇكتى ايەلدەردىڭ، بالالاردىڭ جاعدايىنا ەرەكشە باقىلاۋ جاسالىپ وتىر. ءدارى-دارمەك پەن مەديتسينالىق بۇيىمداردىڭ قورى جەتكىلىكتى»، - دەدى رەسمي وكىل ورتالىق كوممۋنيكاتسيالار قىزمەتىندەگى بريفينگتە.
ايگەرىم ورازاليەۆانىڭ اتاپ وتۋىنشە، ەۆاكۋاتسيالانعان تۇرعىنداردىڭ اراسىندا سوزىلمالى اۋرۋى بار 7617 ادامنىڭ دەنساۋلىعى مەديتسينا قىزمەتكەرلەرىنىڭ باقىلاۋىنا الىنعان.
1 مىڭنان استام مەديتسينا قىزمەتكەرى، ونىڭ ىشىندە 244 دارىگەر، سونداي-اق 80 پسيحولوگ ەۆاكۋاتسيا پۋنكتەرىندە مەديتسينالىق جانە مەديتسينالىق-پسيحولوگيالىق تاۋلىك بويى كومەك كورسەتىپ جاتىر.
ماڭعىستاۋ وبلىسىندا 12 ەۆاكوپۋنكتتە اتىراۋ وبلىسىنان كەلگەن 1721 ادام ورنالاستىرىلدى.
سولتۇستىك قازاقستان وبلىسىندا ەسىل اۋدانىنىڭ سۋ باسقان ايماعىندا 4 ەۆاكوپۋنكت اشىلدى.
باتىس قازاقستان وبلىسىندا سۋ باسۋى مۇمكىن اۋرۋحانالاردان ناۋقاستاردى، مەديتسينالىق جابدىقتاردى ەۆاكۋاتسيالاۋ جوسپارى جاسالدى.
«توتەنشە جاعداي رەجيمى جۇمىس ىستەيتىن بارلىق وڭىردە 387 جۇكتى ايەل باقىلاۋدا، 325 ايەل بوساندى. سۋ تاسقىنى باستالعاننان بەرى ەڭ كوپ بالا قوستاناي، اقتوبە جانە باتىس قازاقستان وبلىستارىندا دۇنيەگە كەلگەن. ەۆاكۋاتسيالىق پۋنكتتەردە 5038 بالا بار، ونىڭ ىشىندە 62 بالا ستاتسيونار جاعدايىندا كومەك، ال تاعى 61 بالا امبۋلاتوريالىق ەم الادى. سۋ تاسقىنى باستالعاننان بەرى پسيحولوگيالىق كونسۋلتاتسيا الۋ ءۇشىن 1004 ءوتىنىش ءتۇستى»، - دەدى ول.
