پرەزيدەنتتىڭ تەلەراديوكەشەنى تۇسىرگەن دەرەكتى فيلم حالىقارالىق فەستيۆالىندە ارنايى ديپلومعا يە بولدى
استانا. قازاقپارات - پرەزيدەنتتىڭ تەلەراديوكەشەنى تۇسىرگەن «قۇلالى ارالىنىڭ تۇرعىنى» («چەلوۆەك س وستروۆا كۋلالى») دەرەكتى فيلمى ت م د ەلدەرىنىڭ دەرەكتى كينوسىنا ارنالعان حالىقارالىق فەستيۆالدە جوعارى باعالاندى. فيلم «ادام مەن تابيعاتتىڭ بىرلىگىن پوەتيكالىق تۇرعىدا بەينەلەگەنى ءۇشىن» ارنايى ديپلومىمەن ماراپاتتالدى.
بۇل تۋىندى مينسك قالاسىندا وتكەن حالىقارالىق كينوفەستيۆالدىڭ مەرەيتويلىق باعدارلاماسىندا قازاقستان اتىنان ۇسىنىلعان جوبالاردىڭ ءبىرى بولدى. «قۇلالى ارالىنىڭ تۇرعىنى» فيلمىنىڭ بايقاۋ باعدارلاماسىنا ەنۋى حالىقارالىق كاسىبي قاۋىمداستىقتىڭ قازاقستاندىق دەرەكتى كينوعا قىزىعۋشىلىعى ارتىپ كەلە جاتقانىن كورسەتەدى.
«فيلم كاسپي تەڭىزىندەگى قۇلالى ارالىندا وركەنيەتتەن جىراقتا ءومىر سۇرەتىن مەتەورولوگ تۋرالى باياندايدى. كەيىپكەردىڭ كۇندەلىكتى تىرشىلىگى ارقىلى اۆتورلار ونىڭ ىشكى جان دۇنيەسىن، وڭاشا ءومىر ءسۇرۋدى سانالى تۇردە تاڭداعانىن جانە مىنەزىن قالىپتاستىرعان ومىرلىك سىناقتارىن بىرتىندەپ اشادى»، - دەلىنگەن «ەۋرازيا. DOC» حالىقارالىق فەستيۆالىنىڭ حابارلاماسىندا.
فيلمدى پرەزيدەنتتىڭ تەلەراديوكەشەنىنىڭ شىعارماشىلىق توبى تۇسىرگەن. رەجيسسەرى - الماس ساتكەنوۆ، سەناري اۆتورى - ەلميرا يشمۇحامەدوۆا، پروديۋسەرى - ادىلبەك قۇلامان، وپەراتورلارى - سايات تاستانوۆ پەن قانات ەڭسەبايەۆ، مونتاج رەجيسسەرى - رۋسلان ايتمامبەتوۆ.
«ەۋرازيا. DOC» حالىقارالىق فەستيۆالى ت م د ەلدەرىنىڭ دەرەكتى فيلم اۆتورلارىن بىرىكتىرىپ، قوعامداعى وزەكتى ماسەلەلەرگە، تاريحي وقيعالارعا جانە ادام تاعدىرىنا ارنالعان تۋىندىلاردى ۇسىنادى. پرەزيدەنتتىڭ تەلەراديوكەشەنى تۇسىرگەن «قۇلالى ارالىنىڭ تۇرعىنى» دەرەكتى فيلمىنىڭ فەستيۆالدىڭ بايقاۋ باعدارلاماسىنا ەنۋى قازاقستاندىق دەرەكتى كينوعا حالىقارالىق فەستيۆالدەردەگى قىزىعۋشىلىقتىڭ ارتىپ كەلە جاتقانىن اڭعارتادى.
