پرەزيدەنت وتانشىلدىقتىڭ باستى ولشەمىن اتادى
استانا. KAZINFORM - شىنايى وتانشىلدىق ادامدارعا قامقورلىقتان كورىنەدى، كەيىنگى ۇرپاققا نە قالدىرامىز دەگەن سالماقتى ساۋالمەن ولشەنەدى. بۇل تۋرالى اۋىل شارۋاشىلىعى ەڭبەككەرلەرىنىڭ Ⅲ فورۋمىندا مەملەكەت باسشىسى قاسىم-جومارت توقايەۆ ايتتى.
- «حالىقتىق قۇرىلىس» باعدارلاماسى، جەمقورلىقپەن جاپپاي كۇرەس، مەملەكەتتىك باسقارۋ جۇيەسىندەگى رەفورما، قوعامدا جاڭا جاسامپاز قۇندىلىقتاردى ورنىقتىرۋ - مۇنىڭ ءبارى ۇلكەن جولدىڭ باسى عانا. الدىمىزدا ءالى كوپتەگەن ءىس پەن بيىك بەلەستەر كۇتىپ تۇر. وسىعان دەيىن ايتقانىمداي، ەل دامۋىنا قاتىستى ورتا جانە ۇزاقمەرزىمدى پەرسپەكتيۆاعا ارنالعان ويلارىم مەن جوسپارىم بار، - دەدى پرەزيدەنت.
قاسىم-جومارت توقايەۆ مەملەكەتىمىزدىڭ ەگەمەندىگىن، تاۋەلسىزدىگىن قورعاۋعا قاتىستى كەيبىر ماسەلە تۇبەگەيلى شەشىمىن تاپپاعانىن تاعى دا باسا ايتتى.
- مەن ول جونىندە حالىققا ارناعان جولداۋىمدا ايتقانمىن. توقمەيىلسىپ، بەيقام ءجۇرۋدىڭ ءجونى جوق. مۇنى جاقسى ءتۇسىنۋىمىز كەرەك. مەنىڭ ويىمشا، مەملەكەت باسشىسىنىڭ مىندەتى - جۇيەلى ارەكەت ەتۋ، دىتتەگەن ماقساتتان اينىماۋ، ەل تاعدىرىنداعى ماڭىزدى شەشىمدەر ءۇشىن جاۋاپكەرشىلىك ارقالاۋ. ەلىمىزدەگى وزگەرىستەردىڭ قارقىن العانى قۋانتادى. ول ەندى توقتامايدى. سوندىقتان حالىقتىڭ ءال-اۋقاتى مەن ۇلتتىق مۇددەنى قارا باسىنىڭ قامىنان جوعارى قوياتىن ناعىز مەملەكەتشىل تۇلعالار قاجەت. شىنايى وتانشىلدىق ادامدارعا قامقورلىقتان كورىنەدى، كەيىنگى ۇرپاققا نە قالدىرامىز دەگەن سالماقتى ساۋالمەن ولشەنەدى، - دەدى مەملەكەت باسشىسى.
پرەزيدەنتتىڭ پايىمىنشا، باق-داۋلەت كەلەدى دە كەتەدى، ال سوڭىڭدا جاساعان ءىسىڭ مەن جاقسى اتىڭ قالادى. سونىڭ ءبىرى - ەرتەڭ ادامدار، كەلەر ۇرپاق يگىلىگىن كورەتىن الەۋمەتتىك ينفراقۇرىلىمدار.
- قوعامدا زاڭ ۇستەمدىگى سالتانات قۇرۋى ءۇشىن سەنىمدى تىرەك كەرەك، ياعني، ادامداردىڭ وزەگى مىقتى، مورالدىق پرينتسيپتەرى مىقتى بولعانى ءجون. ءدال وسى سەبەپتى جاڭا قوعامدىق ەتيكا قالىپتاستىرۋ جانە «تازا قازاقستان» تۇجىرىمىن دارىپتەۋ وتە ماڭىزدى. ويتكەنى تەك اينالامىزدان عانا ەمەس، ازاماتتارىمىزدىڭ نيەت-پيعىلىنان، سوزىنەن جانە ءىس-ارەكەتىنەن تازالىق سەزىلىپ تۇرۋعا ءتيىس، - دەدى قاسىم-جومارت توقايەۆ.