پرەزيدەنت تەلەراديوكەشەنى مەن Al Jazeera بىرلەسكەن ءبىلىم بەرۋ جوبالارىن دامىتادى

قاتاردىڭ جەتەكشى مەديا حولدينگىنىڭ دەلەگاتسياسىن باس ديرەكتور، كورولدىك اۋلەت وكىلى شەيح ناسسەر بين فەيسال ءال ءتانيدىڭ ارنايى تاپسىرماسىمەن Al Jazeera Media Institute ديرەكتورى يمان ءال-امري باستاپ كەلدى.

كەزدەسۋ بارىسىندا راۋشان قاجىبايەۆا مەن يمان ءال-امري قازاقستان مەن ورتالىق ازياداعى مەديا سالاسىنا ارنالعان ءبىلىم بەرۋ باستامالارىن ودان ءارى كەڭەيتۋ ماسەلەلەرىن تالقىلادى.

Al Jazeera Media Institute ديرەكتورى يمان ءال-امري قازاقستاندىق باق ستۋدەنتتەرى مەن كاسىبي ماماندارىنا ارنالعان ءداستۇرلى ءبىلىم بەرۋ باعدارلامالارىن جاڭا باستامالارمەن تولىقتىرۋدى ۇسىندى. اتاپ ايتقاندا، قازاقستاندى ورتالىق ازيا مەن وڭتۇستىك كاۆكازداعى نەگىزگى مەديا ورتالىققا اينالدىرۋ ماقساتىندا بىرلەسكەن «تالانتتار زەرتحاناسىن» قۇرۋ باستاماسىن كوتەردى.

ال Al Jazeera Plus سيفرلىق پلاتفورماسىنىڭ ديرەكتورى اسيل مانسۋر قازاقستان تۋرالى بىرەگەي اۆتورلىق كونتەنت ازىرلەيتىن تالانتتى ءارى كاسىبي كرەاتورلار قاۋىمداستىعىن قالىپتاستىرۋعا باعىتتالعان تۇراقتى جوبا مەن ارنايى وقىتۋ باعدارلاماسىن ىسكە قوسۋدى ۇسىندى.

بۇل باستامالار اياسىندا قازاقستاننىڭ مادەنيەتىن، تاريحى مەن تابيعاتىن ناسيحاتتايتىن بىرەگەي بەينەماتەريالدار ازىرلەنىپ، Al Jazeera Plus پلاتفورماسى ارقىلى الەمدىك اۋديتورياعا ۇسىنىلماق. وسىلايشا، وتاندىق اۆتورلاردىڭ جۇمىستارى حالىقارالىق دەڭگەيدە تارالىپ، قازاقستاننىڭ مادەني- تاريحي مۇراسىن جاھاندىق اۋديتورياعا تانىتۋعا مۇمكىندىك تۋادى.

ءوز كەزەگىندە Al Jazeera Media Network-تىڭ اعا پروديۋسەرى باشار حامدان Al Jazeera Plus پلاتفورماسى ءۇشىن تۇسىرىلگەن سيفرلىق جوبالاردى Al Jazeera 360 پلاتفورماسى مەن مەدياحولدينگتىڭ تەلەارنالارىنا ارنالعان اۋقىمدى دەرەكتى كونتەنتكە اينالدىرۋدى ۇسىندى.

سونىمەن قاتار باشار حامدان Al Jazeera 360 پلاتفورماسىندا «قازاقستانعا اشىلعان تەرەزە» اتتى ارنايى ءبولىم قۇرۋ باستاماسىن كوتەردى. وندا اۆتورلىق ماتەريالدارمەن قاتار پرەزيدەنت تەلەراديوكەشەنىنىڭ ۇزدىك دەرەكتى جوبالارى دا جاريالاناتىن بولادى. ونىڭ پىكىرىنشە، مۇنداي ءبولىم كەڭ اۋديتوريانىڭ قىزىعۋشىلىعىن تۋدىرادى.

پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا اتالعان باستامالاردى جۇزەگە اسىرۋ مەدياجەلىنىڭ وڭىردەگى تۇراقتى قىزمەتىن جولعا قويۋعا جاسالعان العاشقى ماڭىزدى قادام بولاتىنىن اتاپ ءوتتى.

- بۇل باستامالار جۋرناليستەر قاۋىمداستىعىنىڭ كاسىبي قۇزىرەتىن دامىتۋعا جانە جاڭا بۋىن كاسىبي ماماندارىن قالىپتاستىرۋعا ىقپال ەتەدى، - دەدى راۋشان قاجىبايەۆا.

ەسكە سالا كەتەيىك، 2025 -جىلعى جەلتوقساندا دوحا قالاسىندا پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا مەن Al Jazeera Media Network باس ديرەكتورى شەيح ناسسەر بين فەيسال ءال تاني اراسىندا كەزدەسۋ وتكەن بولاتىن. سول كەزدە تاراپتار ەكى مەديا ۇيىم اراسىنداعى ىنتىماقتاستىقتى دامىتۋدىڭ پەرسپەكتيۆالارىن تالقىلادى.

دوحادا وتكەن كەزدەسۋدە Al Jazeera تەلەارناسىن قازاقستاندا تاراتۋ جانە بۇكىل وڭىردەگى وقيعالاردى جاريالاۋعا ارنالعان كاسىبي بازا قۇرۋ ماسەلەلەرىنە قىزىعۋشىلىق بىلدىرىلگەن ەدى. 2026 -جىلى بۇل باستامالار ناقتى جوبالاردى ىسكە اسىرۋ كەزەڭىنە ءوتتى.

انىقتاما:

قازاقستان رەسپۋبليكاسى پرەزيدەنتىنىڭ تەلەراديوكەشەنى - مەدياكونتەنتتى ءوندىرۋ مەن تاراتۋدىڭ بارلىق كەزەڭىن قامتيتىن، ەلىمىزدەگى ەڭ ءىرى تىگىنەن ينتەگراتسيالانعان مەديا كومپانيا.

كومپانيانىڭ قۇرامىنا قازاقستاندىق اۋديتورياعا ارنالعان Jibek Joly تەلەارناسى مەن

اتتاس راديو، Silk Way ،Silk Way Cinema جانە Silk Way Prime حالىقارالىق تەلەارنالارى، «Kazinform» حالىقارالىق اقپارات اگەنتتىگى، دەرەكتى كينو ورتالىعى جانە TRKLAB سيفرلىق بولىمشەسى كىرەدى.

Al Jazeera تەلەكومپانياسى 1996 -جىلى كاتار ءامىرىنىڭ جارلىعىمەن قۇرىلعان. بۇگىندە تەلەارنا الەمنىڭ كوپتەگەن ەلىندە اراب جانە اعىلشىن تىلدەرىندە حابار تاراتادى. ونىڭ شەتەلدەردە 50 دەن استام بيۋروسى بار.

دەرەكتى كونتەنت Al Jazeera Documentary تەلەارناسىنىڭ ەفيرىنەن كورسەتىلەدى.