پرەزيدەنت تاپسىرماسى: كاتونقاراعايداعى اۋەجاي قۇرىلىسى 80 پايىز اياقتالدى
وسكەمەن. KAZINFORM - شىعىس قازاقستان وبلىسىنداعى كاتونقاراعاي اۋدانىندا سالىنىپ جاتقان اۋەجايدى سەرتيفيكاتتاۋ ءراسىمى كەلەسى جىلدىڭ اقپان ايىندا باستالماق.
ش ق و جولاۋشى كولىگى جانە اۆتوموبيل جولدارى باسقارماسىنىڭ مالىمەتىنە سۇيەنسەك، مەملەكەت باسشىسىنىڭ تاپسىرماسىمەن كاتونقاراعاي اۋدانىندا سالىنىپ جاتقان جاڭا اۋەجاي قۇرىلىسىنىڭ 80 پايىزدان استامى اياقتالدى.
قازىرگى ۋاقىتتا ۇشۋ-قونۋ جولاعى تولىق دايىن. ماماندار اۋەجايدى قاجەتتى جابدىقتارمەن جاراقتاندىرۋ، جولاۋشىلار تەرمينالى مەن تەحنيكالىق نىساندارداعى جۇمىستاردى اياقتاۋ ۇستىندە.
2027-جىلدىڭ اقپان ايىندا اۋەجايدى سەرتيفيكاتتاۋ ءراسىمىن باستاۋ جوسپارلانىپ وتىر. ال اۋە ايلاعىن تۋريستىك ماۋسىم باستالعانعا دەيىن پايدالانۋعا بەرۋ كوزدەلگەن.
- اۋەجايدىڭ اسفالتبەتونمەن قاپتالعان ۇشۋ-قونۋ جولاعىنىڭ ۇزىندىعى 2200-2260 مەتر، ەنى 35 مەتر. اۋەجاي ساعاتىنا 150 جولاۋشىعا دەيىن قىزمەت كورسەتە الادى. سونداي-اق Bombardier Q400 جانە ATR-72 سەكىلدى ورتاشا سىيىمدىلىقتاعى زاماناۋي تۋربوۆينتتى ۇشاقتاردى قابىلداۋعا قاۋقارلى بولادى. جاڭا اۋەجايدىڭ اشىلۋى كاتونقاراعاي اۋدانىنا جەتۋدى جەڭىلدەتىپ، تۋريزمنىڭ دامۋىنا سەرپىن بەرمەك، - دەلىنگەن اقپاراتتا.
ەسكە سالساق، بۇعان دەيىن زايسان اۋەجايىندا سەرتيفيكاتتاۋ ءراسىمى باستالعانى حابارلانعان.