پرەزيدەنت شارۋا قوجالىقتارىنا سيفرلىق تەحنولوگيالاردى ەنگىزۋگە كەڭەس بەردى
استانا. KAZINFORM - اۋىل شارۋاشىلىعى ەڭبەككەرلەرىنىڭ Ⅲ فورۋمىندا مەملەكەت باسشىسى قاسىم-جومارت توقايەۆ سيفرلىق تەحنولوگيالار يگىلىگىن كورىپ وتىرعان شارۋا قوجالىعىن اتادى.
- جولداۋدا اۋىل شارۋاشىلىعى سالاسىنا سيفرلىق تەحنولوگيالاردى، سونىڭ ىشىندە جاساندى ينتەللەكتىنى كەڭىنەن ەنگىزۋ قاجەت ەكەنىن ايتتىم. بۇگىندە وزىق شەشىمدەردىڭ يگىلىگىن كورىپ وتىرعان شارۋا قوجالىقتارى از ەمەس. مىسالى، سولتۇستىك قازاقستاندا وسىنداي كاسىپورىندار بار. اتاپ ايتقاندا، «اقسەلەۋ» شارۋاشىلىعى ءوندىرىستى سيفرلىق باسقارۋ جانە جەر سەرىكتەرى ارقىلى باقىلاۋ جۇيەلەرىن ەنگىزدى، - دەدى مەملەكەت باسشىسى.
پرەزيدەنتتىڭ ايتۋىنشا، شارۋاشىلىقتا ەسەپكە الۋ جۇمىستارى اۆتوماتتى تۇردە جۇمىس ىستەپ جاتىر.
- شارۋاشىلىق اۋىل-ايماقتىڭ الەۋمەتتىك ينفراقۇرىلىمىن دامىتۋعا دا ەرەكشە كوڭىل ءبولىپ وتىر. ماسەلەن، تۇرعىندار ورتالىقتان جىلىتۋ جۇيەسىمەن جانە تازا اۋىز سۋمەن قامتاماسىز ەتىلگەن. كاسىپورىن مەكتەپكە، سپورت كەشەنىنە جانە باسقا دا الەۋمەتتىك نىساندارعا تۇراقتى تۇردە قولداۋ كورسەتىپ جاتىر. وسىلايشا سيفرلاندىرۋدىڭ ارقاسىندا اۋىل شارۋاشىلىعى ءوندىرىسىنىڭ تيىمدىلىگى، ونىڭ باسەكەگە قابىلەتى ارتىپ، جالپى اۋىل تۇرعىندارىنىڭ تۇرمىس ساپاسى جاقسارىپ جاتىر. سوندىقتان باسقا دا شارۋا قوجالىقتارى وسى مۇمكىندىكتەردى ءوز ايماقتارىندا قولدانعانى ءجون دەپ سانايمىز، - دەدى قاسىم-جومارت توقايەۆ.