پرەزيدەنت باستاماسىمەن بالا قۇقىعىن قورعاۋعا باعىتتالعان 11 زاڭ قابىلداندى - ەرلان قارين
استانا. KAZINFORM - ۆيتسە-پرەزيدەنت بالالاردىڭ قۇقىقتارى مەن مۇددەلەرىن قورعاۋ سالاسىنداعى پرەزيدەنت باستامالارىن ىسكە اسىرۋ جونىندە كەڭەس وتكىزدى، دەپ حابارلايدى اقوردانىڭ باسپا ءسوز قىزمەتى.
ەرلان قاريننىڭ مالىمەتىنشە، پرەزيدەنت باستاماسىمەن 3 جىلدا بالا قۇقىعىن قورعاۋعا باعىتتالعان 11 زاڭ قابىلداندى.
جيىندا بالا قۇقىقتارى جونىندەگى ۋاكىل - قۇرىلتاي ءتوراعاسىنىڭ ورىنباسارى دينارا زاكيەۆانىڭ، باس پروكۋروردىڭ ءبىرىنشى ورىنباسارى جاندوس ومىراليەۆتىڭ، وقۋ-اعارتۋ ءمينيسترى جۇلدىز سۇلەيمەنوۆانىڭ، ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆتىڭ، دەنساۋلىق ساقتاۋ ءمينيسترى اقمارال ءالنازاروۆانىڭ باياندامالارى تىڭدالدى.
كەڭەستە ەڭ الدىمەن پرەزيدەنت قاسىم-جومارت توقايەۆتىڭ تاپسىرماسىمەن قابىلدانعان 2026-2030 -جىلدارعا ارنالعان «قازاقستان بالالارى» ءبىرتۇتاس تۇجىرىمداماسىن ءتيىمدى ىسكە اسىرۋ ماسەلەلەرى تالقىلاندى.
ۆيتسە-پرەزيدەنت بالالاردىڭ تولىققاندى دامۋىنا جان-جاقتى جاعداي جاساۋ مەملەكەت باسشىسى ۇستانىپ وتىرعان باعداردىڭ نەگىزگى باعىتىنىڭ ءبىرى ەكەنىن اتاپ ءوتتى.
- پرەزيدەنت باستاماسىمەن بالالاردىڭ قۇقىقتارىن قورعاۋ، قاۋىپسىزدىگىن قامتاماسىز ەتۋ، ءبىلىم بەرۋ ساپاسىن ارتتىرۋ، دەنساۋلىعىن ساقتاۋ، الەۋمەتتىك قولداۋ كورسەتۋ، وسكەلەڭ ۇرپاقتى كونستيتۋتسيالىق قۇندىلىقتار رۋحىندا تاربيەلەۋ باعىتىندا تۇتاس شارالار كەشەنى جۇزەگە اسىرىلۋدا، - دەدى ەرلان قارين.
ۆيتسە-پرەزيدەنت «ۇلتتىق قور - بالالارعا» پرەزيدەنتتىك باعدارلاماسى اياسىندا ءۇش جىل ىشىندە 7 ميلليوننان استام بالاعا 2,5 ميلليارد دوللاردان استام قاراجات اۋدارىلعانىن ەسكە سالدى. سونداي-اق پرەزيدەنت باستامالارىن ىسكە اسىرۋ ناتيجەسىندە سوڭعى 7 جىلدا ەلىمىزدە 1 ميلليوننان استام وقۋشىعا ارنالعان 1342 مەكتەپ سالىندى.
سوڭعى ءۇش جىلدا مەملەكەت باسشىسىنىڭ باستاماسىمەن بالالاردىڭ قۇقىقتارى مەن مۇددەلەرىن قامتاماسىز ەتۋگە باعىتتالعان 11 زاڭ قابىلداندى. ونىڭ نەگىزگىلەرىنىڭ ءبىرى - 2024 -جىلى قابىلدانعان ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى زاڭ. وسى زاڭعا سايكەس، الدىن الۋ شارالارى ەنگىزىلىپ، زورلىق-زومبىلىقتىڭ بارلىق تۇرىنە جازا قاتاڭداتىلدى، سونداي-اق بۋللينگكە قاتىستى جاۋاپكەرشىلىك بەلگىلەندى.
قابىلدانعان زاڭنامالىق شارالار ناتيجەسىندە كامەلەتكە تولماعاندارعا قاتىستى قىلمىستىق قۇقىق بۇزۋشىلىقتار سانى ازايدى. اتاپ ايتقاندا، 2024 -جىلمەن سالىستىرعاندا اسا اۋىر قىلمىستار سانى 45 پايىزعا، ال جاسوسپىرىمدەردى جىنىستىق قاتىناسقا تۇسۋگە ماجبۇرلەۋ قىلمىستارىنىڭ سانى 10 پايىزعا تومەندەدى. سونىمەن قاتار كامەلەتكە تولماعاندار تاراپىنان جاسالاتىن قىلمىستاردىڭ دا 10 پايىزعا ازايعانى بايقالىپ وتىر.
وڭىرلەردە بالا قۇقىقتارى جونىندەگى ۋاكىلدىڭ وكىلدىكتەرى جۇمىس ىستەيدى، بالا قۇقىقتارى جونىندەگى باسقارمالار قۇرىلدى، قورعانشىلىق ورگاندارىنىڭ شتات سانى ۇلعايىپ كەلەدى. قالالار مەن اۋدانداردا 160 وتباسىن قولداۋ ورتالىعى اشىلدى.
مەكتەپتەرگە مەملەكەتتىك «111» بايلانىس ورتالىعىنىڭ QR-كودتارى ورناتىلا باستاعان 2024 -جىلدان بەرى بالالار پسيحولوگتارى 186 مىڭنان استام حابارلاما مەن 6700 قوڭىراۋ قابىلداعان. 9 مىڭ جاعداي بويىنشا ومىرلىك قيىن جاعدايعا تاپ بولعان بالالارعا كومەك كورسەتىلدى، ال 73 جاعدايدا سۋيتسيدتىڭ الدىن الۋعا مۇمكىندىك تۋدى.
ماسەلەلەردىڭ تاعى ءبىر بولىگى ينكليۋزيۆتى ساياسات ماسەلەلەرىنە ارنالدى. قازىرگى ۋاقىتتا پرەزيدەنت تاپسىرماسى بويىنشا قۇرىلتاي دەپۋتاتتارى مۇمكىندىگى شەكتەۋلى بالالاردى كەشەندى قولداۋدى رەتتەيتىن زاڭ جوباسىن ازىرلەۋدە.
- زاڭنامالىق نورمالاردىڭ دەكلاراتيۆتىك سيپاتتا بولماعانى، بالالاردى قولداۋ جۇيەسىن جاقسارتۋدى، ولاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتەتىن ناقتى تەتىكتەردى كوزدەۋى، سونداي-اق ۋاكىلەتتى مەملەكەتتىك ورگاندار اراسىنداعى ءوزارا ءىس-قيمىلدى ءدال ايقىنداۋى اسا ماڭىزدى، - دەدى ەرلان قارين.
بۇعان قوسا ۆيتسە-پرەزيدەنت مۇمكىندىگى شەكتەۋلى جانداردى كەمسىتۋدىڭ الدىن الۋعا جانە وعان جول بەرمەۋگە باعىتتالعان زاڭنامالىق نورمالاردى ازىرلەۋ قاجەت ەكەنىنە نازار اۋداردى.
جيىن سوڭىندا ەرلان قارين بالالاردىڭ قۇقىقتارى مەن مۇددەلەرىن قامتاماسىز ەتۋ ىشكى ساياسي جۇمىستاردىڭ باسىم باعىتى رەتىندە ەرەكشە باقىلاۋدا بولاتىنىن اتاپ ءوتتى. وسىعان بايلانىستى پرەزيدەنت باستامالارىنىڭ ىسكە اسىرىلۋ بارىسى رەسپۋبليكالىق كەڭەستە كەمىندە ەكى ايدا ءبىر رەت جۇيەلى ءارى تۇراقتى تۇردە قارالاتىن بولادى. سونداي-اق ۆيتسە-پرەزيدەنت بالالاردىڭ قۇقىعىن قورعاۋ سالاسىندا مەملەكەت باسشىسى جۇكتەگەن تاپسىرمالاردىڭ ورىندالۋىنا وڭىرلىك دەڭگەيدە اي سايىن مونيتورينگ جۇرگىزۋدى تاپسىردى.
بۇدان بۇرىن قازاقستان بالا قۇقىعى جونىنەن الەمدىك رەيتينگتە ۇزدىك 25 ەلدىڭ قاتارىنا ەنگەنىن جازعانبىز.
