پرەزيدەنتتىك ورتالىقتا «العاشقى قوڭىراۋ» ءراسىمى ءوتتى
استانا. KAZINFORM – ق ر پرەزيدەنتى ءىس باسقارماسىنىڭ پرەزيدەنتتىك ورتالىعىندا ەلوردانىڭ بولاشاق ءبىرىنشى سىنىپ وقۋشىلارى ءۇشىن كونستيتۋتسيا جانە ءبىلىم كۇنىنە ارنالعان مەرەكەلىك ساباق ءوتتى.
شاراعا استانانىڭ №96 مەكتەپ- گيمنازياسىنىڭ 30 دان استام وقۋشىسى قاتىستى.
مەرەكەلىك ساباق وتانسۇيگىشتىك، تۋعان ەلگە سۇيىسپەنشىلىك سەزىمىن قالىپتاستىرۋعا جانە تاريبەلەۋگە، سونداي-اق بالالاردىڭ قازاقستان تۋرالى بىلىمدەرىن جيناقتاپ-جۇيەلەۋگە، رەسپۋبليكانىڭ مەملەكەتتىك رامىزدەرىنە دەگەن قۇرمەتتى كوزقاراستى دامىتۋعا باعىتتالعان.
«بالالار - ءبىزدىڭ بولاشاعىمىز. بۇل تۋرالى پرەزيدەنتىمىز دە ايتىپ ءجۇر. كونستيتۋتسيادا جازىلعانداي، ەلىمىزدىڭ ەڭ نەگىزگى بايلىعى - ادام، ونىڭ قۇقىقتارى مەن بوستاندىعىن قورعاۋعا مىندەتتىمىز. سوندىقتان ەلىمىزدىڭ ەرتەڭى - جاس بۇلدىرشىندەرگە اق جول تىلەۋ ماقساتىندا بۇگىنگى شارانى ۇيىمداستىردىق. وتانىن، ەلىن، تۋعان قالاسىن سۇيۋگە باعىتتايتىن بالالار شىعارماشىلىعىن ۇيىمداستىرۋدا پرەزيدەنتتىك ورتالىق پەن ەلوردالىق ءبىلىم وردالارى اراسىندا جىلدار بويعى تۇراقتى ارىپتەستىك قاتىناس ورناعان»، - دەدى ق ر پرەزيدەنتتىك ورتالىعىنىڭ ديرەكتورىنىڭ ورىنباسارى سەرىك سىدىقوۆ.
بۇل رەتتە پرەزيدەنتتىك ورتالىق مۋزەيىن كەز كەلگەن ادام تەگىن تاماشالاي الادى. اسىرەسە، ورتالىق مەكتەپ وقۋشىلارى مەن قالا قوناقتارىن اسىعا كۇتەدى.
مەرەكەلىك ساباققا قاتىسۋشىلار ءوز بىلىمدەرى مەن ونەرىن كورسەتىپ، قازاقستان تۋرالى ءان شىرقاپ، حورەوگرافيالىق قويىلىم كورسەتتى.
ساباق سوڭىندا بۇلدىرشىندەرگە ارنالعان العاشقى قوڭىراۋ سوعىلدى، بۇل ولاردىڭ ومىرىندەگى جاڭا جانە ماڭىزدى كەزەڭنىڭ باستالۋىن بىلدىرەدى.
مەرەكەلىك شارا سوڭىندا كىشكەنتاي قاتىسۋشىلارعا العاشقى ساباقتان ەستەلىك رەتىندە سىيلىقتار تابىستالىپ، گيمنازيا ۇستازدارىنا العىس حاتتار بەرىلدى.
ايتا كەتەيىك، ەلوردالىق ءبىلىم باسقارماسىنىڭ مالىمەتىنشە، استانادا جالپى 187 مەكتەپ بار. جاڭا 2024-2025-وقۋ جىلىندا ەلوردا مەكتەپتەرىنە 28 مىڭعا جۋىق بالا قابىلدانادى.
