پرەزيدەنتتىك جاستار كادر رەزەرۆى كادرلاردى ىرىكتەۋ جۇيەسىندە باسەكەلەستىككە جول اشادى - ەرمەك توقتاروۆ

بيىل پرەزيدەنتتىك جاستار كادر رەزەرۆىنە ءۇشىنشى رەت ىرىكتەۋ وتكىزىلۋدە. 30 -قىركۇيەكتە قاتىسۋعا قۇجاتتاردى قابىلداۋ اياقتالدى، دەپ حابارلايدى قازاقپارات.

وتىنىمدەردى قابىلداۋعا بەرىلگەن ءبىر ايدا جوبانىڭ pkrezerv.gov.kz رەسمي سايتىندا 30 مىڭنان استام ادام تىركەلىپ، ونىڭ ىشىندە 6404 قاتىسۋشى «ماتىندىك اقپاراتپەن جۇمىس ىستەۋ قابىلەتىن باعالاۋ» تەستىلەۋىنە جىبەرىلدى.

ق ر پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ ستراتەگيالىق تالداۋ ءبولىمىنىڭ باسشىسى ەرمەك توقتاروۆ پرەزيدەنتتىك جاستار كادر رەزەرۆى جوباسىنىڭ ەرەكشەلىگىن اتاپ كورسەتتى.

"پرەزيدەنتتىك جاستار كادر رەزەرۆىنىڭ ەرەكشەلىگى، ونىڭ از ۋاقىت ىشىندە دارىندى جاس مامانداردى مەملەكەتتىك مەنەدجمەنتكە تارتۋعا ارنالعان قۋاتتى الەۋەتىندە جاتىر. پ ج ك ر- گە مۇشەلىك «الەۋمەتتىك ليفت» بولىپ تابىلادى، سەبەبى ول بوس لاۋازىمعا كونكۋرسقا قاتىسۋ ءۇشىن بەلگىلى ءبىر لاۋازىمداردا جۇمىس تاجىريبەسىنە قويىلاتىن تالاپتى ەڭسەرۋگە مۇمكىندىك بەرەدى. ءبىراق پ ج ك ر- گە تۇسەر الدىندا ۇمىتكەرلەر تەستىلەۋ مەن اڭگىمەلەسۋدى قوسا العاندا، بىرنەشە ىرىكتەۋ كەزەڭىنەن وتەتىنىن ەسكەرۋىمىز كەرەك. پ ج ك ر مىندەتى - قانداي دا ءبىر تالاپتاردى اينالىپ ءوتۋ ەمەس، مەملەكەتتىك قىزمەت جۇيەسىندە جۇمىس ىستەمەيتىن دارىندى جاس ازاماتتارعا ءوز جوبالارىمەن، كوزقاراستارىمەن بەلگىلى ءبىر سالاعا كەلىپ، يننوۆاتسيالىق شەشىمدەردى جۇزەگە اسىرۋعا مۇمكىندىك بەرۋ"، - دەدى ەرمەك توقتاروۆ.

سونداي- اق، ساراپشى پرەزيدەنتتىك جاستار كادر رەزەرۆىنىڭ ءبىرىنشى جانە ەكىنشى ىرىكتەۋىنەن ءوتىپ، رەزەرۆتە تۇرعان مامانداردان ءقازىردىڭ وزىندە جاڭا بۋىن مەنەدجەرلەرى قالىپتاسقانىن اتاپ ءوتتى.

"رەزەرۆ مەملەكەتتىك قىزمەتشى لاۋازىمدارىنا نەعۇرلىم دايىن ۇمىتكەرلەردى تاڭداۋعا مۇمكىندىك بەرىپ قانا قويمايدى. ول مەملەكەتتىك باسقارۋ سالالارىنا كادرلاردى ىرىكتەۋ جۇيەسىندە باسەكەلەستىككە جول اشادى. بۇل جەردە رەزەرۆ مۇشەلەرى ىستەپ تۇرعان مەملەكەتتىك ورگاننىڭ جۇمىسىنا تارتىلىپ، ءوز كوزقاراسىن اكەلىپ، باسقارۋشىلىق يننوۆاتسيالاردى ۇسىنا الادى.

نەگىزگى سۇراق مەملەكەتتىك مەنەدجەرلەردىڭ جاڭا بۋىنىن قالىپتاستىرۋدا عانا ەمەس، سونىمەن قاتار مەملەكەتتىك باسقارۋ جۇيەسىنىڭ بۇكىل ادامي كاپيتالىن جەتىلدىرۋ تۋرالى بولىپ وتىر. مەملەكەتتىك قىزمەتشىلەر كورپۋسىنىڭ دامىپ، جاڭا ساپالىق دەڭگەيگە كوتەرىلۋى وتە ماڭىزدى. قازىرگى تاڭدا رەزەرۆتىڭ ءۇشىنشى تولقىنىنا ىرىكتەۋ ءجۇرىپ جاتىر. ياعني، ءبىرىنشى جانە ەكىنشى تولقىننان رەزەرۆتە تۇرعاندارمەن بىرگە ءقازىردىڭ وزىندە جاڭا بۋىن مەنەدجەرلەرىنىڭ كوپ بولىگى قالىپتاستى"، - دەدى قازاقستان ستراتەگيالىق زەرتتەۋلەر ينستيتۋتىنىڭ ستراتەگيالىق تالداۋ ءبولىمىنىڭ باسشىسى.

اۆتور

ەربول جانات