پرەزيدەنتتىڭ جاڭاجىلدىق قۇتتىقتاۋىن استانا مەن الماتى تۇرعىندارى LED ەكرانداردان تىڭدادى
استانا. KAZINFORM - مەملەكەت باسشىسى قاسىم-جومارت توقايەۆتىڭ قازاقستان حالقىن جاڭا جىل مەرەكەسىمەن قۇتتىقتاۋى ەلوردا مەن الماتى قالاسىنىڭ بىرنەشە جەرىندە ورنالاسقان LED ەكرانداردان كورسەتىلدى.
ەلوردادا پرەزيدەنتتىڭ جاڭاجىلدىق قۇتتىقتاۋى ءتورت جەردە، ياعني قازاق ەلى الاڭىندا، ەلوردا اكىمدىگىنىڭ الدىندا، ەكسپو قالاشىعى اۋماعىندا جانە «استانا-ارەنا» ستاديونى الدىندا تىكەلەي تاراتىلدى.
ال الماتى قالاسىندا مەملەكەت باسشىسىنىڭ قۇتتىقتاۋى «استانا» ورتالىق الاڭىندا، الماتى حالىقارالىق اۋەجايىندا، الماتى-1 جانە الماتى-2 ۆوكزالىندا LED ەكران ارقىلى كورسەتىلدى.
وسىلايشا، پرەزيدەنتتىڭ جاڭاجىلدىق ءداستۇرلى قۇتتىقتاۋ ءسوزىن بۇل جولى قازاقستاندىقتار ۇيدەگى نەمەسە جۇمىس ورىندارىنداعى كوگىلدىر ەكرانداردان عانا ەمەس، اشىق اسپان استىندا تۇرىپ تىڭداۋ مۇمكىندىگىنە يە بولدى.
سونداي-اق، استانا مەن الماتى قالاسىندا مەرەكەلىك وتشاشۋ بولدى. ەلوردادا بوتانيكالىق باقتاعى وتشاشۋدى تاماشالاۋعا جينالعان جۇرتتىڭ قاراسى كوپ.
ايتا كەتەيىك، بيىل اقوردادا Ratovich پەن وتىرار سازى ەلىمىزدىڭ ءانۇرانىن تەڭدەسى جوق تاندەمدە ورىندادى.
ەسكە سالساق، وتكەن جىلى جاڭا جىل مەرەكەسىنە وراي ەلىمىزدىڭ ءانۇرانىن اقوردادا سيمفونيالىق وركەستردىڭ سۇيەمەلدەۋىمەن الەمگە ايگىلى ديماش قۇدايبەرگەن ورىنداعان ەدى.
سونىمەن قاتار مەملەكەت باسشىسى قاسىم-جومارت توقايەۆتىڭ جاڭا جىلمەن قۇتتىقتاۋىن Jibek Joly تەلەارناسى ارقىلى كورسەتىلدى.
