پرەزيدەنتتىڭ اتىنا ورازا ايت مەرەكەسىنە وراي قۇتتىقتاۋ جەدەلحاتتارى ءتۇسىپ جاتىر
استانا. KAZINFORM - مەملەكەت باسشىسى قاسىم-جومارت توقايەۆتىڭ اتىنا بارشا مۇسىلمان قاۋىمى ءۇشىن قاسيەتتى سانالاتىن ورازا ايتقا وراي شەت مەملەكەتتەردىڭ باسشىلارىنان جانە حالىقارالىق ۇيىمداردىڭ جەتەكشىلەرىنەن قۇتتىقتاۋ جەدەلحاتتارى كەلىپ ءتۇسىپ جاتىر.
تۇركيا پرەزيدەنتى رەجەپ تايپ ەردوعان قاسىم-جومارت توقايەۆقا تۇرىك حالقىنىڭ جانە جەكە ءوز اتىنان جۇرەكجاردى لەبىزىن ءبىلدىرىپ، وعان زور دەنساۋلىق، باقىت، ال دوستاس ءارى باۋىرلاس قازاقستان جۇرتشىلىعىنا باق-بەرەكە تىلەدى.
- ىنتىماق-بىرلىك، باۋىرلاستىق قۇندىلىقتارىن دارىپتەيتىن وسى قاسيەتتى مەرەكە يسلام الەمىنە جانە بارشا ادامزاتقا بەيبىتشىلىك، باق-بەرەكە الا كەلسىن،- دەپ جازىلعان تۇركيا پرەزيدەنتىنىڭ قۇتتىقتاۋ جەدەلحاتىندا.
وزبەكستان پرەزيدەنتى شاۆكات ميرزيەيەۆ ءوز قۇتتىقتاۋىندا مەملەكەت باسشىسى قاسىم-جومارت توقايەۆ پەن باۋىرلاس قازاقستان حالقىنا ىزگى تىلەگىن بىلدىرگەن.
- كەيىنگى جىلدارى ورتاق مادەني جانە رۋحاني قۇندىلىقتاردى قاستەرلەيتىن دوستاس حالىقتارىمىزدىڭ ءوزارا بىرلىگى نىعايىپ كەلەدى. ونىڭ بەيبىتشىلىك پەن تىنىشتىقتى، ءوزارا دوستىقتى دارىپتەيتىن قاسيەتتى رامازان ايى مەن ورازا ايتتىڭ ىزگى قاعيداتتارىمەن ۇندەسەتىنى ءسوزسىز، - دەپ جازىلعان جەدەلحاتتا.
قىرعىزستان پرەزيدەنتى سادىر جاپاروۆ قۇتتىقتاۋىندا مەملەكەتىمىزدىڭ باسشىسىنا اماندىق تىلەپ، قازاقستان حالقىنىڭ بەيبىت زاماندا ءوسىپ-وركەندەي بەرۋىنە تىلەكتەستىك بىلدىرگەن.
- سەنىمنىڭ بەرىكتىگىن، توزىمدىلىك پەن بىرلىكتى ايشىقتايتىن وسىناۋ رۋحاني مەرەكەدە حالىقتارىمىزدىڭ ىنتىماعى نىعايىپ، باق-بەرەكەسى ەسەلەنە بەرسىن، - دەپ جازدى قىرعىز ەلىنىڭ باسشىسى.
تاجىكستان پرەزيدەنتى ەمومالي راحمون ءوز جەدەلحاتىندا ەلدەرىمىز اراسىنداعى دوستىق قارىم-قاتىناستىڭ جوعارى دەڭگەيىنە كوڭىلى تولاتىنىن اتاپ وتكەن.
- بارشا مۇسىلمان ەلدەرى ءۇشىن قاسيەتتى سانالاتىن مەيرامنىڭ ادامگەرشىلىككە ۇندەيتىن قۇندىلىقتارى مەن جاسامپاز ءداستۇرى حالىقتارىمىز اراسىنداعى مىزعىماس بەرىك بايلانىستى نىعايتۋعا الداعى ۋاقىتتا دا قىزمەت ەتە بەرەتىنىنە سەنىمدىمىن، - دەپ جازعان تاجىكستان باسشىسى.
قاسيەتتى ورازا ايت مەيرامىنا وراي ىزگى تىلەگىن تۇرىكمەنستان پرەزيدەنتى سەردار بەردىمۇحامەدوۆ تە جولدادى.
- ەجەلدەن ادامگەرشىلىك، قايىرىمدىلىق، مەيىرىمدىلىك جانە رۋحاني تازالىق سەكىلدى اسىل قاسيەتتەردى دارىپتەيتىن بۇل مەيرام مۇسىلمان ۇمبەتى اراسىنداعى ءوزارا تۇسىنىستىكتى، ىنتىماق پەن تاتۋلىقتى نىعايتا بەرەتىنىنە كامىل سەنەمىن، - دەپ جازعان تۇرىكمەنستان پرەزيدەنتى.
سونىمەن قاتار مەملەكەت باسشىسىن ءباا پرەزيدەنتى شەيح مۇحاممەد بەن زايد ءال ناحايان، يوردانيا كورولى II ابداللا، ماروككو كورولى VI مۇحاممەد، باحرەين كورولى حاماد بەن يسا ءال حاليفا، كۋۆەيت مەملەكەتىنىڭ ءامىرى شەيح ميشاال ءال- احماد ءال- دجابەر اس- ساباح، ليۆيا پرەزيدەنتتىك كەڭەسىنىڭ ءتوراعاسى مۇحاممەد يۋنيس ءال- مانفي، ومان سۇلتانى حايسام بەن تاريق، يراك پرەزيدەنتى ابدۋل لاتيف راشيد، پالەستينا پرەزيدەنتى ماحمۋد ابباس، پاكىستان پرەمەر- ءمينيسترى شاحباز شاريف، سينگاپۋر پرەمەر- ءمينيسترى لي سيان لۋن، ب ا ءا ۆيتسە-پرەزيدەنتى، پرەمەر-ءمينيسترى جانە دۋباي ءامىرشىسى شەيح مۇحاممەد بەن راشيد ءال ماكتۋم، ب ا ءا ۆيتسە-پرەزيدەنتى، پرەمەر- ءمينيستردىڭ ورىنباسارى شەيح مانسۋر بەن زايد ءال ناحايان، تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ، تاتارستان رەسپۋبليكاسىنىڭ رايسى رۋستام ميننيحانوۆ، يسلام ىنتىماقتاستىعى ۇيىمىنىڭ باس حاتشىسى حيسسەين براحيم تاحا جانە تاعى باسقالار قۇتتىقتادى.
قازاقستان پرەزيدەنتىنىڭ اتىنا قۇتتىقتاۋ حاتتارى مەن جەدەلحاتتار ءالى دە كەلىپ ءتۇسىپ جاتىر.
