پرەزيدەنتتىڭ 9-15-قازان ارالىعىنداعى اپتالىق جۇمىسىنا ۆيدەوشولۋ

 اقوردا قازاقستان پرەزيدەنتى قاسىم-جومارت توقايەۆتىڭ 9-15-قازان ارالىعىنداعى اپتالىق جۇمىسىنا ۆيدەوشولۋ ۇسىندى، دەپ حابارلايدى Kazinform. 

9-قازاندا مەملەكەت باسشىسى ىشكى ىستەر ءمينيسترى ەرجان سادەنوۆتى قابىلدادى. قاسىم-جومارت توقايەۆقا ەلىمىز بويىنشا كىسى ءولتىرۋ، بۇزاقىلىق، ۇرلىق، قاراقشىلىق، توناۋ جانە مال ۇرلىعىنا قاتىستى قىلمىستار سانىنىڭ ايتارلىقتاي تومەندەۋىنە ىقپال ەتكەن الدىن الۋ شارالارى تۋرالى مالىمەت بەرىلدى.

سول كۇنى قاسىم-جومارت توقايەۆ قارجىلىق مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى. جىل باسىنان مەملەكەتكە جالپى سوماسى 217 ميلليارد تەڭگە بولاتىن اكتيۆتەر قايتارىلعانى باياندالدى.

10-قازاندا پرەزيدەنت جۇمىس ساپارىمەن قىزىلوردا وبلىسىنا باردى. وندا ساپارىن سىرداريا اۋدانى ناعي ءىلياسوۆ اۋىلىنىڭ تىنىس-تىرشىلىگىمەن تانىسۋدان باستادى.

كەيىن بىلتىر بوي كوتەرگەن «ەڭبەك اللەياسىندا» ەڭبەك ادامدارىمەن جۇزدەستى. «شىن مانىندە، ەڭبەك ادامدارى حالقىمىز ءۇشىن ەڭ قاجەت ازاماتتار. ەڭ الدىمەن، ءبىز ەڭبەك ادامدارىنا قۇرمەت كورسەتۋىمىز كەرەك. سىزدەر وسى اق كۇرىشتىڭ اتاسى - ىبىراي جاقايەۆتىڭ جولىن جالعاپ جۇرسىزدەر. سوندىقتان مەن سىزدەردى قولدايمىن»، - دەدى مەملەكەت باسشىسى.

ودان ءارى قىزىلوردا وبلىسىنداعى ماڭىزدى نىسانداردىڭ جوباسىمەن تانىستى. پرەزيدەنت قىزىلوردادا سالىنىپ جاتقان ج ە و-نى مەرزىمىندە ىسكە قوسۋدى تاپسىردى.

تەمىربەتون بۇيىمدارى زاۋىتىنا، «التىن وردا» كۇرىش زاۋىتىنا باردى.

مەملەكەت باسشىسى 11-قازان كۇنى وتكەن الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ XXI وتىرىسىنا قاتىسۋشىلارعا ۇندەۋ جولدادى.

قىتايدا وتكەن ازيا ويىندارىنىڭ جۇلدەگەرلەرىن قابىلدادى.

وتانداستار فورۋمىنا قاتىسۋشىلارعا ۇندەۋ جاسادى.

قر قاۋىپسىزدىك كەڭەسىنىڭ وتىرىسى وتكىزدى. وندا ازىق-تۇلىك قاۋىپسىزدىگىن قامتاماسىز ەتۋ جونىندەگى پروبلەمالار قاراستىرىلدى.

جىل سايىن وتەتىن Digital Bridge 2023 حالىقارالىق تەحنولوگيالىق فورۋمىنا قاتىسىپ، ءسوز سويلەدى. فورۋم اياسىندا ءبىرقاتار شەتەلدىك كومپانيانىڭ باسشىلارىمەن كەزدەستى.

12-قازاندا پرەزيدەنت الماتى اكىمى ەربولات دوسايەۆتى قابىلداپ، 9 ايدا اتقارعان جۇمىسىن تىڭدادى.

سول كۇنى «قازاق ءتىلى» قوعامىنىڭ پرەزيدەنتى، ۇلتتىق قۇرىلتايدىڭ مۇشەسى راۋان كەنجەحان ۇلىنا قازاق ءتىلىن دامىتۋعا باعىتتالعان ءبىرقاتار تاپسىرما بەردى.

13-قازاندا مەملەكەت باسشىسى قىرعىزستانعا جۇمىس ساپارىمەن باردى.

وندا ت م د-عا مۇشە مەملەكەت باسشىلارى كەڭەسىنىڭ كەڭەيتىلگەن قۇرامداعى وتىرىسىنا قاتىسىپ، ءسوز سويلەدى.

اۆتور

گۇلميرا الياكپاروۆا