پرەزيدەنتتەر ەلەكتروندىق ۇكىمەت سالاسىنداعى ىنتىماقتاستىق جەتىستىكتەرىمەن تانىستى
دۋشانبە. KAZINFORM - قاسىم-جومارت توقايەۆ پەن ەمومالي راحمونعا بيىل ەكى ەلدىڭ ماماندارى ينتەرنەت-رەسۋرستاردىڭ ءبىرىڭعاي پلاتفورماسى مەن SmartBridge جۇيەلەرىنىڭ نەگىزگى كومپونەنتتەرىن تاجىكستان سەرۆەرلەرىندە ءساتتى ورنالاستىرعانى جونىندە باياندالدى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
قازاقستاننىڭ سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ پەن تاجىكستاننىڭ يننوۆاتسيالار جانە سيفرلىق تەحنولوگيالار اگەنتتىگىنىڭ ديرەكتورى ميرزو حۋرشەد تاجىك ماماندارىنىڭ ارنايى وقۋ كۋرسىنان وتكەنىن جەتكىزدى. قازىر تاجىكستاننىڭ مەملەكەتتىك ورگاندارىنا ارنالعان سايتتاردى ازىرلەۋ جۇمىستارى قولعا الىنىپ، IT- شەشىمدەردى ينتەگراتسيالاۋ ءىسى ەگجەي-تەگجەيلى پىسىقتالىپ جاتىر.
قاسىم-جومارت توقايەۆ پەن ەمومالي راحمونعا مەملەكەتتىك قىزمەتتەردىڭ قولجەتىمدىلىگىن جانە تيىمدىلىگىن ارتتىرۋ ءۇشىن جاساندى ينتەللەكت تەحنولوگيالارىن پايدالانۋ مۇمكىندىكتەرى جايىندا مالىمەت بەرىلدى. بۇل ەكى ەل اراسىنداعى ىنتىماقتاستىقتىڭ ەڭ پەرسپەكتيۆتى باعىتىنىڭ ءبىرى بولماق.
قاسىم-جومارت توقايەۆ تاجىكستان رەسپۋبليكاسىنا مەملەكەتتىك ساپارمەن بارعانىن جازعان بولاتىنبىز.
قاسىم-جومارت توقايەۆتى «قاسري ميللات» سارايىندا تاجىكستان پرەزيدەنتى ەمومالي راحمون قارسى الدى.
قازاقستان مەن تاجىكستان پرەزيدەنتتەرى شاعىن قۇرامدا كەلىسسوز جۇرگىزدى.
