پرەزيدەنتكە ماڭعىستاۋ وبلىسىنداعى ينۆەستيتسيالىق جوبالار تانىستىرىلدى

استانا. KAZINFORM - مەملەكەت باسشىسىنا ماڭعىستاۋ وبلىسىنداعى ينۆەستيتسيالىق جوبالار تانىستىرىلدى، دەپ حابارلايدى اقوردانىڭ باسپا ءسوز قىزمەتى.

وڭىردەگى ءىرى ينۆەستيتسيالىق جوبالار قاتارىندا اقتاۋ قالاسىنداعى قۋاتى 160 مۆت بولاتىن بۋ-گاز قوندىرعىسىنىڭ قۇرىلىسى، مۋلتيمودالدى لوگيستيكالىق-اۆياتسيالىق حاب، كەمە قۇراستىرۋ ۆەرفى، بەكىرە بالىعىن ءوسىرۋ جانە ۋىلدىرىق ءوندىرۋ شارۋاشىلىعى، «بوزجىرا» ۆيزيت ورتالىعىن سالۋ، سونداي-اق اممياك-كارباميد كەشەنىن ىسكە قوسۋ سەكىلدى ەلەۋلى جوبالار بار.

قاسىم-جومارت توقايەۆقا بىلتىر ايماق ەكونوميكاسىنا 1,1 ميلليارد دوللار كولەمىندە تىكەلەي شەتەلدىك ينۆەستيتسيا تارتىلعانى جونىندە مالىمەت بەرىلدى. قۇنى 36 ميلليارد تەڭگە بولاتىن 15 ينۆەستيتسيالىق جوبا جۇزەگە اسىرىلىپ، 530 تۇراقتى جۇمىس ورنى اشىلعان. 5,7 تريلليون تەڭگەگە 55 الەۋەتتى ينۆەستيتسيالىق جوبانىڭ پۋلى جاساقتالدى.

وسىعان دەيىن مەملەكەت باسشىسى قاسىم-جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس وتكەنىن جازدىق.