پرەزيدەنتكە الماتىنىڭ بيىلعى الەۋمەتتىك- ەكونوميكالىق دامۋى جونىندە ەسەپ بەرىلدى
مەملەكەت باسشىسىنا الماتىنىڭ بيىلعى 11 ايداعى الەۋمەتتىك- ەكونوميكالىق دامۋىنىڭ الدىن الا قورىتىندىسى جونىندە ەسەپ بەرىلدى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
ەربولات دوسايەۆ اتالعان كەزەڭ ىشىندە قىسقامەرزىمدى ەكونوميكالىق ينديكاتور 13 پايىزعا ارتقانى تۋرالى باياندادى. مەملەكەتتىك بيۋدجەت تۇسىمدەرى 4,9 تريلليون تەڭگەگە جەتىپ، ءوسىم كورسەتكىشى 34,5 پايىزدى قۇراعان. قاراشا ايىندا جىلدىق ينفلياتسيا 10,5 پايىزعا دەيىن باسەڭدەگەن. جالپى، جىل قورىتىندىسى بويىنشا ەلىمىزدەگى ەڭ ءىرى قالا ەكونوميكاسىنىڭ ءوسىمى 6,5 پايىز دەڭگەيىندە بولادى دەگەن بولجام جاسالىپ وتىر (2022 ج. - %5,0) .
نەگىزگى كاپيتالعا قۇيىلعان ينۆەستيتسيانىڭ جالپى كولەمى 20 پايىزعا ۇلعايعانى جايىندا اقپارات بەردى. جەكە ينۆەستيتسيا 30,3 پايىزعا ارتىپ، 1,4 تريلليون تەڭگەگە جەتكەن. جىل باسىنان بەرى قالا ەكونوميكاسىنا بارلىعى 1,53 تريلليون تەڭگە سالىنعان.
الماتىدا قوعامدىق كولىكتى دامىتۋ جانە ەكولوگيالىق تالاپتارعا سايكەستەندىرۋ ءۇشىن كەشەندى جۇمىستار جۇرگىزىلىپ جاتقانىن ايتتى. بيىل قالانىڭ اۆتوبۋس پاركى ەكولوگيالىق تازا 1150 جاڭا اۆتوبۋسپەن تولىققان. ونىڭ 550 ءىن جەكە تاسىمالداۋشىلار ساتىپ العان. سوڭعى 11 جىلدا العاش رەت تروللەيبۋس پاركى دە جاڭارتىلا باستاعان. بۇگىندە 100 تروللەيبۋس ساتىپ الىنعان، قوسىمشا تاعى 100 ءىن ساتىپ الۋ ارقىلى كەلەسى جىلى تروللەيبۋس پاركى تولىقتاي جاڭارادى. جول- كولىك ينفراقۇرىلىمىنىڭ دامۋى تۋرالى باياندادى. قالانىڭ 70 كوشەسىنە 25 شاقىرىم جاڭا جول سالىنعان جانە 200 شاقىرىم جولعا ورتاشا جوندەۋ جۇمىستارى جۇرگىزىلگەن.
الەۋمەتتىك ينفراقۇرىلىمدى جاڭعىرتۋعا قاتىستى مالىمەت بەردى. دەنساۋلىق ساقتاۋ سالاسىندا مەديتسينالىق- سانيتاريالىق العاشقى كومەكتىڭ (م س ا ك) جاڭا ءبىرىڭعاي ستاندارتى بەلسەندى تۇردە ەنگىزىلۋدە.
الماتىدا «جايلى مەكتەپ» ۇلتتىق جوباسى اياسىندا 37,1 مىڭ ورىندىق 22 مەكتەپتىڭ قۇرىلىسى مەن جوبالاۋ جۇمىستارى باستالعان. جىل باسىنان بەرى NEET ساناتىنداعى 36,7 مىڭ ازامات جۇمىسقا ورنالاستىرىلعانى جونىندە ايتتى. ونىڭ 82 پايىزى - تۇراقتى جۇمىس ورنى. قاجەتتى ماماندىقتاردى وقىتۋدىڭ قىسقامەرزىمدى كۋرستارى جانە Jobfair365 بوس جۇمىس ورىندارىنىڭ سيفرلىق پلاتفورماسى ىسكە قوسىلعان. جاستار ءۇشىن 8 كوميۋنيتي- ورتالىعى اشىلعان.
پرەزيدەنتتىڭ قالانى كوگالداندىرۋ جونىندەگى تاپسىرماسىنىڭ ورىندالۋ بارىسى ەرەكشە باقىلاۋدا ەكەنىن جەتكىزدى. جىل باسىنان بەرى 276 مىڭ ءتۇپ كوشەت وتىرعىزىلعان. جىل سوڭىنا دەيىن ولاردىڭ سانى 320 مىڭعا جەتكىزىلمەك. الماتىداعى ساياباقتار اۋماعى 397 گەكتارعا ۇلعايعان.
قاسىم- جومارت توقايەۆ مەگاپوليس ەكونوميكاسىن ودان ءارى ءارتاراپتاندىرۋ، ينۆەستيتسيا تارتۋ، شاعىن جانە ورتا بيزنەستى قولداۋ شارالارىن كۇشەيتۋ جونىندە ناقتى تاپسىرمالار بەردى. سونداي- اق اكىمگە قوعامدىق كولىكتى ەكولوگيالىق تالاپتارعا سايكەستەندىرۋ جانە الماتىنىڭ كولىك قاتىناستارى جۇيەسىن دامىتۋ مىندەتىن جۇكتەدى.
