پرەزيدەنت يدەياسى: الماتىدا تاۋلىك بويى جۇمىس ىستەيتىن ءۇشىنشى كىتاپحانا اشىلدى
الماتى. KAZINFORM - الماتىدا اباي داڭعىلى، 141 مەكەنجايىندا ورنالاسقان تاعى ءبىر كىتاپحانا ەندى 24/7 رەجيمىندە جۇمىس ىستەيدى.

الماتى قالاسىنىڭ مادەنيەت باسقارماسى ءمالىم ەتكەندەي، الماتىنىڭ ەكى كىتاپحاناسى - جامبىل اتىنداعى قالالىق جاس وسپىرىمدەر كىتاپحاناسى مەن Alatau Creative Hub ورتالىعىنىڭ كىتاپحاناسى بىلتىر قىركۇيەك ايىنان بەرى وقىرمانداردى تاۋلىك بويى قابىلداپ كەلەدى.

بۇل ادىستەمە وقۋشىلار، ستۋدەنتتەر، ماگيسترانتتار، سونداي-اق دوكتورانتتار اراسىندا ۇلكەن سۇرانىسقا يە.

وسىعان بايلانىستى مەگاپوليستىڭ اباي داڭعىلى، 141 مەكەنجايىندا ورنالاسقان تاعى ءبىر كىتاپحاناسى ەندى 24/7 رەجيمىندە جۇمىس ىستەيدى.

«قازىر الماتىدا ءۇش كىتاپحانا وقىرمانداردى 24 ساعات بويى قابىلدايدى. كەز كەلگەن ادام وزىنە ىڭعايلى ۋاقىتتا كەلە الادى. جاڭا جۇمىس فورماتى ەنگىزىلگەن سوڭ كەلۋشىلەر سانى دا ارتتى. جالپى الماتىلىقتار كىتاپ وقىعاندى جاقسى كورەدى. تەك قالالىق كىتاپحانالارداعى كورسەتكىشتەرگە توقتالساق، وقىرماندار جىل سايىن كەم دەگەندە ءۇش ميلليون رەت كەلىپ- كەتەدى»، - دەپ حابارلايدى الماتى قالاسىنىڭ مادەنيەت باسقارماسى.

ەسكە سالايىق، 2023-جىلدىڭ ماۋسىم ايىندا تۇركىستاندا وتكەن «ادىلەتتى قازاقستان - ادال ازامات» ۇلتتىق قۇرىلتايىنىڭ ەكىنشى وتىرىسى بارىسىندا قاسىم-جومارت توقايەۆ 24/7 (تاۋلىگىنە 24 ساعات، اپتاسىنا 7 كۇن) رەجيمدە جۇمىس ىستەيتىن كىتاپحانا قۇرۋ يدەياسىن ايتقان بولاتىن.