پرەزيدەنت توقايەۆتىڭ دوستىقتى باعالاۋى كوپ نارسەنى اڭعارتادى - سينگاپۋر ەلشىسى
استانا. KAZINFORM - سينگاپۋردىڭ قازاقستانداعى ەلشىسى زۋلكيفلي بين باحارۋدين Silk Way تەلەارناسىنا ەكسكليۋزيۆتى سۇحبات بەرىپ، ق ر پرەزيدەنتىنىڭ سينگاپۋرعا رەسمي ساپارىنان نە كۇتەتىنى تۋرالى ويىمەن ءبولىستى.
ايتۋىنشا، بۇل ساپار ەكى ەل اراسىنداعى سەرىكتەستىكتى نىعايتا تۇسۋگە جاڭا مۇمكىندىكتەر اشادى.
«مەنىڭ ويىمشا، ەكى ەل اراسىنداعى قارىم-قاتىناستىڭ ارتىقشىلىعى مەن بىرەگەيلىگى، پرەزيدەنت توقايەۆتىڭ ءبىزدىڭ ەلىمىزدى جاقسى بىلەتىندىگىنە بايلانىستى. جاس كەزىندە ول وسىندا جاقىن جەردە تۇردى. دوستارىنىڭ ءبىرقاتارى ءالى دە وسى ايماقتا تۇرادى جانە كەزدەسۋدى كۇتىپ ءجۇر. پرەزيدەنت مىرزا دا ولاردى ەسىنەن شىعارماعان. ول كىسىنىڭ بۇل جەر تۋرالى جىلى ەستەلىكتەرى بار دەپ ويلايمىن. ءومىرىنىڭ ءبىراز بولىگىن وسىندا وتكىزدى جانە بۇل قالىپتاسۋ جىلدارى ەدى دەپ ايتۋىمىزعا بولادى. سينگاپۋردىڭ بۇرىنعى جانە جۋىردا كەزدەسۋى جوسپارلانعان قازىرگى كوشباسشىلارىمەن بايلانىسى بەرىك. سوندىقتان، مۇنى پرەزيدەنت توقايەۆتىڭ دوستىقتى قالاي قاتتى باعالايتىنىنىڭ بىردەن-ءبىر كورسەتكىشى دەپ ەسەپتەيمىن. بۇل ونىڭ مىنەزى مەن تۇلعالىق قاسيەتتەرىنە قاتىستى كوپ نارسەنى اڭعارتادى. ول تەك مەملەكەتتىك دەڭگەيدە عانا ەمەس، جەكە ومىردە دە دوستىق بايلانىسىن ۇزگەن ەمەس. بۇل ساپار رەسمي قارىم-قاتىناستى ءوزارا تۇسىنىستىك پەن تۇراقتى دامۋعا نەگىزدەلگەن جاڭا دەڭگەيگە كوتەرەدى دەگەن ءۇمىت بار»، - دەدى ەلشى اڭگىمە بارىسىندا.
ايتا كەتسەك، مەملەكەت باسشىسى قاسىم-جومارت توقايەۆ 23-24-مامىر كۇندەرى پرەزيدەنت تارمان شانمۋگاراتنامنىڭ شاقىرۋىمەن سينگاپۋر رەسپۋبليكاسىنا مەملەكەتتىك ساپارمەن بارادى. ساپار اياسىندا سينگاپۋردىڭ جوعارى باسشىلىعىمەن، حالىقارالىق ءىرى كومپانيالاردىڭ جەتەكشىلەرىمەن ءبىرقاتار كەزدەسۋ وتكىزەدى جانە قازاقستان-سينگاپۋر بيزنەس فورۋمىنىڭ جۇمىسىنا قاتىسادى دەپ جوسپارلانىپ وتىر.
