پرەزيدەنت TikTok كومپانياسىنىڭ باس ديرەكتورى جوۋ شۋزىمەن ءبىرقاتار ماسەلەنى تالقىلادى
مەملەكەت باسشىسى TikTok كومپانياسىنىڭ باس ديرەكتورى جوۋ شوزىمەن كەزدەستى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
پرەزيدەنت ەلىمىزدە TikTok پلاتفورماسىنىڭ تانىمالدىلىعى ارتىپ كەلە جاتقانىن اتاپ ءوتتى. قازىر وعان 10 ميلليوننان استام قازاقستاندىق تىركەلگەن. بەينەكونتەنت جاساۋعا جانە قاراۋعا ارنالعان الەمگە تانىمال سەرۆيس العاشقىلاردىڭ ءبىرى بولىپ قوسىمشا ينتەرفەيسىن قازاق تىلىنە اۋداردى. سونداي- اق كيبەربۋللينگتىڭ الدىن الۋ ماسەلەلەرى بويىنشا ۋاكىلىن تاعايىندادى.
ءوز كەزەگىندە جۋ شۋزى Astana Hub حالىقارالىق تەحنوپاركىمەن بىرلەسىپ، TikTok StartUp Academy جوباسىن - قازاقستاندىق ستارتاپتارعا ارنالعان ەكسكليۋزيۆتى ءبىلىم بەرۋ باعدارلاماسىن جۇزەگە اسىرىپ جاتقانى تۋرالى باياندادى. بۇدان بولەك، سەرىكتەستىك اياسىندا TikTok Startup Valley بايقاۋى وتكىزىلدى. ناتيجەسىندە 200 دەن استام ستارتاپ ءوز ونىمدەرىن TikTok ارقىلى جارنامالاۋ ادىستەرىن ۇيرەتۋ كۋرسىنان ءوتتى.
پرەزيدەنت TikTok كومپانياسىنىڭ باس ديرەكتورى جۋ شۋزىمەن ءبىرقاتار ماسەلەنى تالقىلادى
كەزدەسۋ بارىسىندا كرەاتيۆتى يندۋستريا سالاسىنداعى ىنتىماقتاستىق، جاساندى ينتەللەكت بويىنشا زەرتتەۋ جۇرگىزۋ، ەلەكتروندى ساۋدانى دامىتۋ، سونداي- اق TikTok پلاتفورماسى ارقىلى قازاقستاننىڭ مادەنيەتى مەن تۋريستىك مۇمكىندىكتەرىن جاھاندىق دەڭگەيدە ناسيحاتتاۋ ماسەلەلەرى قاراستىرىلدى.
