پرەزيدەنت «تازا قازاقستان» ەكولوگيالىق اكسياسىنا قاتىستى
استانا. KAZINFORM - مەملەكەت باسشىسى قاسىم-جومارت توقايەۆ «تازا قازاقستان» رەسپۋبليكالىق ەكولوگيالىق اكسياسى اياسىندا ۇيىمداستىرىلعان جالپىقالالىق سەنبىلىككە قاتىسىپ، ەلورداداعى «ۇلىتاۋ» اللەياسىندا اعاش وتىرعىزدى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتپەن بىرگە سەنبىلىككە ۆولونتەرلەر، «اسسامبلەيا جاستارى» ۇيىمىنىڭ وكىلدەرى، ەلىمىزدىڭ عىلىم، كرەاتيۆتى يندۋستريا، مادەنيەت، سپورت سالالارىنداعى بەلسەندى جاستار جانە الداعى V دۇنيەجۇزىلىك كوشپەندىلەر ويىندارىنا قاتىسۋشىلار، پرەزيدەنتتىك جاستار كادر رەزەرۆىنىڭ مۇشەلەرى اتسالىسىپ، جوكە اعاشىنىڭ 430 ءتۇپ كوشەتىن ەكتى.
سەنبىلىك بارىسىندا قاسىم- جومارت توقايەۆ جاستارمەن اڭگىمەلەستى. پرەزيدەنت قوعامدا ەكولوگيا مادەنيەتىن قالىپتاستىرۋ، تابيعاتتى ايالاۋ ماڭىزدى ەكەنىن اتاپ ءوتتى.
- شىن مانىندە، ەلىمىزدى كوگالداندىرۋ، اباتتاندىرۋ - ۇلكەن مەملەكەتتىك ماڭىزى بار ءىس. بۇل بۇگىن شىعىپ، ەرتەڭ ۇمىتىپ كەتەتىن بىررەتتىك ناۋقان ەمەس. اتالعان جۇمىس تۇراقتى تۇردە جۇرگىزىلەدى. تۋعان جەرىمىزدى تازا ۇستاۋىمىز كەرەك. بۇل - جالپىۇلتتىق ماسەلە. قازاقستانىمىز تازا بولۋى قاجەت. لاس ەلگە قوناق رەتىندە، ينۆەستور رەتىندە ەشكىم كەلمەيدى. ءبىراق، ەڭ الدىمەن، قازاقستاننىڭ تازا، كورىكتى بولعانى ءبىز ءۇشىن، ياعني حالىق ءۇشىن كەرەك. بۇل كۇندەلىكتى ءومىر سالتىنا اينالۋى قاجەت. سونداي-اق بۇل جۇمىس ەلوردا جانە ءىرى قالالاردا عانا ەمەس، شاعىن قالالاردا، اۋداندار مەن اۋىلداردا دا ۇدايى ۇيىمداستىرىلادى. بۇكىل قازاقستاندى تازا ۇستاۋ وزىمىزگە، جاستارعا بايلانىستى. مەن جاستارعا سەنەمىن. سوندىقتان جاستارعا زور ۇمىتپەن قارايمىن، - دەدى مەملەكەت باسشىسى.
پرەزيدەنت زاڭ مەن ءتارتىپ ۇستەمدىگى بارىنە قاتىستى ەكەنىن ايتىپ، ۆانداليزممەن باتىل تۇردە كۇرەسۋ قاجەت ەكەنىنە نازار اۋداردى.
- ءبىز ءوز ەلىمىزدى ماقتان تۇتۋعا ءتيىسپىز. مەيلى ول كوشە، اۋلا نەمەسە ۇيلەردىڭ كىرەبەرىسى بولسىن، بارىنە ۇقىپتى قاراۋىمىز قاجەت. ۆاندالدارمەن تاباندى تۇردە كۇرەسۋ كەرەك. سونداي-اق ولاردىڭ زاڭ جۇزىندە قاتاڭ جازالاناتىنىن ايتتىم. ءار نارسەنىڭ شەگى بار. ايتپەسە، ءبارىن ءبۇلدىرىپ الىپ، كەيىننەن كەشىرىم سۇرايدى. ەلىمىزدە ءتارتىپ بولۋى كەرەك. زاڭدى ساقتاۋ قاجەت، - دەدى قاسىم-جومارت توقايەۆ.
بۇدان كەيىن مەملەكەت باسشىسى بوتانيكالىق باقتى ارالاپ، جالپىقالالىق سەنبىلىككە قاتىسىپ جاتقان تۇرعىندارعا، ەلوردانىڭ كوممۋنالدىق شارۋاشىلىق مەكەمەلەرىنىڭ قىزمەتكەرلەرىنە ريزاشىلىعىن ءبىلدىردى.
بۇعان دەيىن مەملەكەت باسشىسى «قازاقستان رەسپۋبليكاسىنىڭ مەملەكەتتىك ناگرادالارى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋ ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويعانىن جازعان بولاتىنبىز.
