پرەزيدەنت تاپسىرماسىنىڭ ورىندالۋى: 10 ميلليون گەكتار جەر مەملەكەت مەنشىگىنە قايتارىلدى
پايدالانىلماي جاتقان جانە زاڭنامانى بۇزا وتىرىپ بەرىلگەن اۋىل شارۋاشىلىعى ماقساتىنداعى 10 ميلليون گەكتار جەر مەملەكەت مەنشىگىنە قايتارىلدى، دەپ حابارلايدى Kazinform.
2022-2023 -جىلدار ارالىعىندا مەملەكەت باسشىسى قاسىم- جومارت توقايەۆتىڭ قازاقستان حالقىنا جولداۋىندا ايتىلعان تاپسىرماسىنا سايكەس ءتيىستى جۇمىستار اتقارىلدى.
ق ر پرەزيدەنتىنىڭ تاپسىرمالارىن ساپالى ءارى ۋاقتىلى ورىنداۋ ماقساتىندا پرەمەر- مينيستر ءاليحان سمايىلوۆتىڭ وكىمىمەن ارنايى مەملەكەتتىك كوميسسيا قۇرىلدى. ونىڭ قۇرامىنا قۇقىق قورعاۋ ورگاندارىنىڭ، مينيسترلىكتەر مەن اكىمدىكتەردىڭ وكىلدەرى كىردى.
«جۇرگىزىلگەن جۇمىستاردىڭ ناتيجەسىندە پايدالانىلماي جاتقان جانە زاڭنامانى بۇزا وتىرىپ بەرىلگەن 10 ميلليون گەكتار اۋىل شارۋاشىلىعى جەرلەرى مەملەكەت مەنشىگىنە قايتارىلدى. سونداي-اق جايىلىمدىق جەر تاپشىلىعى ماسەلەسىنىڭ وزەكتىلىگىن ەسكەرە وتىرىپ، قايتارىلعان جەرلەردى ءتيىستى ەلدى مەكەندەرگە بەكىتۋ ارقىلى باسىم تارتىپپەن شارۋالاردىڭ قاجەتتىلىكتەرى ءۇشىن بەرىلۋدە»، - دەپ جازدى ۇكىمەتتەن.
مەملەكەت باسشىسىنىڭ تاپسىرمالارىن ورىنداۋدا «AMANAT» پارتياسى جانىنداعى «جەر اماناتى» كوميسسياسىنىڭ قوعامدىق- پارتيالىق باقىلاۋى ماڭىزدى فاكتورعا اينالدى. اتاپ ايتقاندا، اتالعان كوميسسيا قايتارىلاتىن جەرلەردى قايتا ءبولۋدى باقىلاۋمەن اينالىستى.
جەردى حالىق اراسىندا ودان ءارى ءادىل ءبولۋ ماسەلەلەرى ق ر ۇكىمەتىنىڭ ەرەكشە باقىلاۋىندا بولادى.
