پرەزيدەنت سىنىنان كەيىن الەۋمەتتىك تولەمدەر قىسقارتىلا ما - تامارا دۇيسەنوۆانىڭ جاۋابى

استانا. KAZINFORM - پرەمەر-ءمينيستردىڭ ورىنباسارى تامارا دۇيسەنوۆا ۇكىمەتتىڭ كەڭەيتىلگەن وتىرىسىنان كەيىن ب ا ق وكىلدەرىنىڭ سۇراعىنا بەرگەن جاۋابىندا قايتا جاساقتالعان ۇكىمەت الەۋمەتتىك ساياساتتى قالاي جۇرگىزەتىنىن ايتتى.

«پرەزيدەنت الەۋمەتتىك تولەمدەردىڭ كولەمىن كوبەيتۋ ارقىلى حالىق اراسىندا ماسىلدىق قالىپتاستىرۋعا جول بەرىلگەنىن ايتتى. بۇل الەۋمەتتىك تولەمدەر قىسقارتىلادى دەگەن ءسوز بە؟» - دەپ سۇرادى جۋرناليست.

ۆيتسە-پرەمەر ونداي ۇستانىم جوق ەكەنىن اتاپ ءوتتى.

«جوق. جالپى پرەزيدەنت مەملەكەتتىك كومەك مۇقتاج ازاماتتارعا بەرىلۋ كەرەك دەگەن باستى قاعيداتتى ۇستاپ وتىر. ول وتە دۇرىس دەپ ويلايمىز. سوندىقتان بۇگىنگى تاڭدا الەۋمەتتىك زاڭنامالاردا قاراستىرىلعان الەۋمەتتىك كومەكتەردىڭ سانى ەشقانداي كەمىمەيدى. ءبىراق تاعايىنداعان كەزدە مۇقتاج ازاماتتارعا بەرۋ ماسەلەسىن، الەۋمەتتىك تەڭدىكتى قالىپتاستىرۋ ماسەلەسىن قاراستىرىپ وتىرمىز. سوندىقتان ءبىز نەگىزىنەن كەلگەن ازاماتتار مۇقتاج با، مۇقتاج ەمەس پە، سوعان كوبىرەك كوڭىل اۋدارامىز»، - دەدى تامارا دۇيسەنوۆا.

ۇكىمەت باسشىسىنىڭ ورىنباسارى اتاۋلى الەۋمەتتىك كومەك الاتىن حالىقتىڭ سانى كەيىنگى 3-4 جىلدا 2 ميلليوننان 500 مىڭعا دەيىن قىسقارعانىن ايتتى.

«ەستەرىڭىزدە بولسا، بۇدان 3-4 جىل الدىن 2 ميلليون ازامات اتاۋلى الەۋمەتتىك كومەك العان. سوندا تەكسەرىلگەن كەزدە، ونىڭ ىشىندە سىزدەردىڭ دە كومەكتەرىڭىز ارقىلى وتە كوپ ازاماتتىڭ ءۇي-جايى بار ەكەنىنە، تابىسى بار ەكەنىنە كوز جەتكىزگەن بولاتىنبىز. قازىر بۇل ماسەلە جۇمىس ىستەپ جاتىر. ءبىراق مەحانيزمدەرىن ءارى قاراي جەتىلدىرەمىز. وتكەن جىلدىڭ ەسەبىن قاراساڭىز، 500 مىڭنان استام ادام اتاۋلى كومەك العان. سوندا ءبىز جانە جەرگىلىكتى مەملەكەتتىك ورگاندار ناعىز مۇقتاج ازاماتتاردىڭ ساناتىنا كەلە جاتىرمىز دەپ ايتۋعا بولادى»، - دەدى ول.