پرەزيدەنت گەرمانيا ەكونوميكاسى شىعىس كوميتەتىنىڭ باسقارما ءتوراعاسى كاترينا كلااس-ميۋلحويزەردى قابىلدادى
استانا. KAZINFORM - كەزدەسۋ بارىسىندا پرەزيدەنت قاسىم- جومارت توقايەۆ پەن گەرمانيا ەكونوميكاسى شىعىس كوميتەتىنىڭ باسقارما ءتوراعاسى جانە CLASS Group كومپانياسى بايقاۋشىلار كەڭەسىنىڭ ءتوراعاسى كاترينا كلااس- ميۋلحويزەر ەكىجاقتى ەكونوميكالىق ىنتىماقتاستىقتى ودان ءارى نىعايتۋ پەرسپەكتيۆاسىن تالقىلادى، دەپ حابارلادى اقوردانىڭ باسپا ءسوز قىزمەتى.
مەملەكەت باسشىسىنىڭ ايتۋىنشا، گەرمانيا قازاقستاننىڭ ەۋروپا وداعىنداعى ستراتەگيالىق سەرىكتەسى سانالادى. ساۋدا-ەكونوميكالىق قاتىناستار قارقىندى دامىپ كەلەدى. سونداي-اق نەمىس بيزنەسى قازاقستانداعى ۇلەسىن كەڭەيتۋگە قىزىعۋشىلىق تانىتىپ وتىر.
پرەزيدەنت بىلتىر قازاقستانعا گەرمانيادان تارتىلعان تىكەلەي ينۆەستيتسيا كولەمى 64 پايىزعا ءوسىپ، 770 ميلليون دوللارعا جەتكەنىن اتاپ ءوتتى. بۇل - رەكوردتىق كورسەتكىش.
كەزدەسۋدە اۋىل شارۋاشىلىعى سالاسىنداعى ىنتىماقتاستىق ماسەلەسىنە دە ەرەكشە نازار اۋدارىلدى. وسى ورايدا قاسىم-جومارت توقايەۆ بۇعان دەيىن ورنىقتى ەگىنشىلىكتىڭ ايماقتىق ورتالىعىن قۇرۋ جونىندە ۇسىنىس ايتقانىن ەسكە سالدى. پرەزيدەنتتىڭ پىكىرىنشە، بۇل ورتالىق ەلىمىزدىڭ اۋىل شارۋاشىلىعى الەۋەتىن بارىنشا تولىق پايدالانۋعا، يننوۆاتسيالىق تەحنولوگيالاردى ەنگىزۋگە جانە ولاردى كوممەرتسيالاندىرۋعا ىقپال ەتەدى.
مەملەكەت باسشىسى قازاقستاننىڭ اگرارلىق الەۋەتىن دامىتۋعا CLASS زاۋىتىنىڭ قوسقان ۇلەسىن جوعارى باعالادى.
