پرەزيدەنت گۋربانگۋلى بەردىمۇحامەدوۆپەن تەلەفون ارقىلى سويلەستى

استانا. KAZINFORM — مەملەكەت باسشىسى تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆپەن تەلەفون ارقىلى سويلەستى. بۇل تۋرالى اقوردا ءمالىم ەتتى.

Казахстан готов поддержать инициативы Туркменистана в Год мира и доверия - Президент
Фото: Акорда

اڭگىمەلەسۋ بارىسىندا قاسىم-جومارت توقايەۆ پەن گۋربانگۋلى بەردىمۇحامەدوۆ ەكى ەلدىڭ ستراتەگيالىق سەرىكتەستىگىن ودان ءارى نىعايتۋ ماسەلەلەرىن تالقىلادى.

پرەزيدەنت باۋىرلاس حالىقتىڭ ۇلت كوشباسشىسىن تۇرىكمەنستاننىڭ باستاماسىمەن ب ۇ ۇ باس اسسامبلەياسى جاريالاعان حالىقارالىق بەيبىتشىلىك جانە سەنىم جىلىنىڭ باستالۋىمەن قۇتتىقتادى.

مەملەكەت باسشىسى قازىرگىدەي جاھاندىق سىن-قاتەرلەر كەزەڭىندە اشحابادتىڭ بەيبىتشىلىك پەن بىتىمگەرلىككە ۇندەگەن باستاماسىنىڭ ەرەكشە ماڭىزىن اتاپ ءوتىپ، ونى تابىستى جۇزەگە اسىرۋ ءۇشىن قازاقستاننىڭ جان-جاقتى قولداۋ كورسەتۋگە دايىن ەكەنىن ايتتى.

گۋربانگۋلى بەردىمۇحامەدوۆ حالىقارالىق بەيبىتشىلىك جانە سەنىم جىلىنىڭ اياسىندا وڭىرلىك جانە حالىقارالىق دەڭگەيدەگى ىنتىماقتاستىق پەن دامۋدى قامتاماسىز ەتۋگە باعىتتالعان تۇرىكمەنستان تۇجىرىمداماسىنىڭ نەگىزگى باسىمدىقتارى جونىندە مالىمەت بەردى.

قاسىم-جومارت توقايەۆ پەن گۋربانگۋلى بەردىمۇحامەدوۆ قازاق-تۇرىكمەن قاتىناستارىنىڭ دەڭگەيى جوعارى ەكەنىنە نازار اۋدارىپ، ەنەرگەتيكا، كولىك-ترانزيت، مادەني-گۋمانيتارلىق سالالارداعى بۇعان دەيىن قول جەتكىزىلگەن ۋاعدالاستىقتاردى جۇزەگە اسىرۋ بارىسىن ەگجەي-تەگجەيلى قاراستىردى.

اڭگىمەلەسۋ بارىسىندا وڭىرلىك ىقپالداستىق ماسەلەلەرىنە جانە الداعى ۋاقىتقا جوسپارلانعان بەسجاقتى فورماتتاعى ءىس-شارالارعا ايرىقشا ءمان بەرىلدى.

ەسكە سالا كەتەيىك، بۇعان دەيىن مەملەكەت باسشىسى تۇركيا پرەزيدەنتىنە كوڭىل ايتۋ جەدەلحاتىن جولداعانىن جازعان بولاتىنبىز.

سوڭعى جاڭالىقتار