پرەزيدەنت قوعامدىق 5 كەسەلدى جويۋعا بۇكىل ەل جۇمىلۋى كەرەكتىگىن ايتتى
استانا. KAZINFORM - ءار ادامنىڭ وي-ساناسى جانە مىنەز-قۇلقى جاقسارسا، تۇتاس قوعام جاقسارادى. بۇل تۋرالى مەملەكەت باسشىسى قاسىم-جومارت توقايەۆ «بىرلىك. جاسامپازدىق. ورلەۋ» تاقىرىبىمەن ءوتىپ جاتقان قازاقستان حالقى اسسامبلەياسىنىڭ كەزەكتى 33-سەسسياسىندا ايتتى.
«اسسامبلەيا جاستاردىڭ يدەولوگيالىق تاربيەسىن ايرىقشا نازاردا ۇستايدى. بۇل - بولاشاقتا نە بولارىن بولجاپ ءبىلۋ مۇمكىن ەمەس، قازىرگىدەي الماعايىپ الەمدە اسا ماڭىزدى ماسەلە. اسسامبلەيا ەتنوسارالىق كوممۋنيكاتسيا ورتالىقتارىن دامىتۋمەن جانە وسىنداي جاڭا ورتالىقتار اشۋمەن اينالىسادى. سونداي-اق الەۋمەتتىك ماڭىزى بار جوبالاردى قولداپ، ەرىكتىلەردى جانە جەرگىلىكتى بىرلەستىكتەردى ىنتالاندىرۋمەن شۇعىلدانادى»، - دەدى پرەزيدەنت.
مەملەكەت باسشىسى ۇلتتىق قۇرىلتايدا قازىر ەلگە قاۋىپ ءتوندىرىپ تۇرعان بەس كەسەلگە توقتالعانىن ەسكە سالدى.
«اسسامبلەيا ناشاقورلىق، قۇمارپازدىق (لۋدومانيا)، تۇرمىستىق زورلىق-زومبىلىق، ۆانداليزم جانە ىسىراپشىلدىق سياقتى الەۋمەتتىك كەسەلدەرمەن كۇرەسۋ ىسىندە ماڭىزدى ءرول اتقارادى. قاۋىپسىز ءومىر ءسۇرۋ ءۇشىن وسىنداي قاتەرلى قۇبىلىستاردان ءبىرجولا ارىلۋىمىز كەرەك. بۇل - اسىرەسە، ۇرپاقتىڭ بولاشاعى ءۇشىن ايرىقشا ماڭىزدى. ءبىز بالالار مەن جاستاردى بارىنشا قورعاپ، دۇرىس تاربيەلەۋىمىز قاجەت. قوعامدىق كەسەلدەردى تۇبىرىمەن جويامىز دەسەك، ورتاق ىسكە بۇكىل ەل بولىپ جۇمىلعان ءجون»، - دەدى قاسىم-جومارت توقايەۆ.
پرەزيدەنت وعان ۇلتىنا، دىنىنە، الەۋمەتتىك جاعدايىنا قاراماستان، بارلىعى اتسالىسۋى كەرەكتىگىن باسا ايتتى.
«ۇلى ىستەر شاعىن ارەكەتتەردەن باستالادى». سول سياقتى كىشىگىرىم ارەكەتتەر اۋقىمدى وزگەرىستەرگە جول اشادى. ءار ادامنىڭ وي-ساناسى جانە مىنەز-قۇلقى جاقسارسا، تۇتاس قوعام جاقسارادى. ماقسات-مۇراتى بيىك بولسا، ەلدىڭ رۋحى دا بيىك بولادى. «ادال ازامات» بولۋ اسا ماڭىزدى. ءبىر سوزبەن ايتساق، كەلەڭسىز ۇردىستەردەن جاي عانا جيرەنۋ جەتكىلىكسىز. ونى جويۋعا دا بەلسەنە اتسالىسۋ كەرەك»، - دەدى مەملەكەت باسشىسى.
