پرەزيدەنت قۇتتىقتاۋىنان كەيىنگى جاڭاجىلدىق بەينەبايان قالاي ءتۇسىرىلدى
استانا. KAZINFORM - مەملەكەت باسشىسى قاسىم-جومارت توقايەۆتىڭ جاڭاجىلدىق قۇتتىقتاۋىنان كەيىن ءداستۇرلى تۇردە ورىندالاتىن ءانۇرانعا تۇسىرىلگەن بەينەبايان بيىل دا ەرەكشە بولدى. وسىعان وراي بەينەبايان رەجيسسەرى اقىلبەك شالجانوۆقا حابارلاسىپ، ءتۇسىرىلىمنىڭ قالاي جۇرگىزىلگەنىن سۇراپ بىلگەن ەدىك.
- جاڭاجىلدىق بەينەباياندى ەكى بولىممەن تۇسىردىك. ءبىرىنشى - مەملەكەت باسشىسى قۇتتىقتاۋىنان كەيىن پرەزيدەنت وركەسترى 50 مۋزىكانتىنىڭ سۇيەمەلدەۋىمەن قۇرمەت قاراۋىلىنىڭ 150 قىزمەتكەرى ورىنداعان ءانۇران، - دەدى ول.
رەجيسسەردىڭ ايتۋىنشا، ەكىنشى بولىمدە ديريجەر دينارا تىلەندييەۆا مەن تانىمال پيانيست Ratovich-تىڭ اۋەنسىز كومپوزيتسياسى ءتۇسىرىلدى. بۇل كومپوزيتسيا بارلىق تەلەارناعا تاراتىلىپ، ءار تەلەارنا جاڭاجىلدىق كەشكە ارنالعان مۋزىكالىق باعدارلامالارىن وسى كومپوزيتسيامەن باستادى.
- بۇل بەينەباياندا ەكى وركەستردى قوستىق. ءبىرىنشىسى - وتىرار سازى، ەكىنشىسى - استانا وپەرا. دينارا مەن Ratovich-تىڭ ءتۇسىرىلىمى ەكى كۇنگە جوسپارلاندى. ءبىرىنشى كۇنگى ءتۇسىرىلىم تولىقتاي دالادا جۇرگىزىلدى. اقوردانىڭ الدىنا قۇرمەت قاراۋىلىنىڭ 100 جانە ارتىنا 50 قىزمەتكەرى ساپ تۇزەدى. ال Ratovich اقوردانىڭ ارتىنداعى الاڭقايدا پيانينومەن ءانۇراندى وينادى. ەكىنشى كۇنگى ءتۇسىرىلىم تەك اقوردانىڭ ىشىندە بولدى. وندا وتىرار سازى مەن استانا وپەرا وركەسترلەرى ءانۇراندى ورىندادى. بۇل كەزدە اقوردانىڭ الدىنا قۇرمەت قاراۋىلىنىڭ 100 قىزمەتكەرى ساپ تۇزەسە، ال ىشىندە 150 ادام ءانۇراندى شىرقادى، - دەدى رەجيسسەر.
ونىڭ اتاپ وتۋىنشە، بەينەبايان ءتۇسىرىلىمنىڭ ءۇشىنشى كۇنى رۋم تۋرعا ارنالدى.
- بۇل كۇنى حالىق كورە بەرمەيتىن، بىلمەيتىن اقوردانىڭ ىشىندەگى مەملەكەت باسشىسى مارتەبەلى مەيماندارمەن شاعىن جانە كەڭەيتىلگەن قۇرامدا كەلىسسوزدەر وتىزەتىن زالداردى، كىتاپحانانى، قىسقى باقتى، عيماراتقا كىرە بەرىستى كورسەتۋگە تىرىستىق. مۇنى بيىلعى ءتۇسىرىلىمنىڭ باستى ەرەكشەلىكتەرىنىڭ ءبىرى دەسەك، ارتىق ايتقاندىق ەمەس. ياعني، حالىققا اقوردانىڭ ەسىگىن ايقارا اشىپ، بەينەبايان ارقىلى ساياحات جاساۋعا مۇمكىندىك بەردىك، - دەدى ول.
ءوز كەزەگىندە اقىلبەك شالجانوۆ تاعى ءبىر ەرەكشەلىكتى اتاپ ءوتتى.
- تاعى ءبىر ەرەكشەلىك - التىن ءجىپ. جاڭا جىل مەرەكەلىك كوڭىل كۇي سىيلايتىن ەرەكشە كۇن بولعاندىقتان ەرتەگى ەلەمەنتتەرىن قوستىق. ياعني، اۋەدەن تومەن قۇلديلاعان التىن ءجىپ اقوردانىڭ باستى ەسىگى ارقىلى ىشكە ەنىپ، جوعارىدا اتاپ وتكەن رۋم تۋر كەزىندە ءار زالدى كورسەتىپ كەلە تازىعا اينالادى. تازىنى اقورداعا كىرگىزۋ سەبەبى - ۇلتتىڭ جەتى قازىناسىن جاڭعىرتۋ. باسقا ءيت تۇقىمدارىنا قاراعاندا وتە تازا، جاعىمسىز ءيىسى جوق. سوندىقتان تەك تازىنى عانا كيىز ۇيگە كىرگىزگەن. ودان كەيىن تازى بۇركىتكە اينالۋ ارقىلى عيماراتتان ۇشىپ شىعىپ، اقوردانىڭ توبەسىنە قوناقتايدى. بۇركىت - قازاق ءۇشىن كيەلى قۇس. تۋىمىزدا دا بەينەلەنگەن، - دەدى ا. شالجانوۆ.
ونىڭ اتاپ وتۋىنشە، پرەزيدەنت تەلەراديوكەشەنى وتكەن جىلدان بەرى مەملەكەت باسشىسىنىڭ قۇتتىقتاۋىنان كەيىنگى ءانۇراندى ورىنداۋ ءساتىن ەرەكشە جاساۋعا تىرىسىپ كەلەدى.
- ەستەرىڭىزدە بولسا، وتكەن جىلى ديماش مەملەكەت باسشىسىنىڭ جاڭاجىلدىق قۇتتىقتاۋىنان كەيىن اقوردادا ءانۇراندى ورىنداپ، كورەرمەنگە ەرەكشە كوڭىل- كۇي سىيلاعان ەدى. بيىل دا وسى دەڭگەيدەن تومەن تۇسپەۋگە تىرىستىق. تەلەراديوكەشەننىڭ شىعارماشىلىق ۇجىمى بۇل بەينەباياندى تۇسىرۋگە بۇكىل جان-دۇنيەسىن سالدى. سوندىقتان دا كوزىقاراقتى كورەرمەننىڭ كوڭىلىنەن شىقتى دەپ ويلايمىز، - دەدى بەينەبايان رەجيسسەرى.
تۇسىرىلىمگە پرەزيدەنت تەلەراديوكەشەنىنىڭ 30 دان استام قىزمەتكەرى جۇمىلدىرىلدى. ناقتىراق ايتقاندا، «ق ر پ ءى ب قازاقستان رەسپۋبليكاسى پرەزيدەنتىنىڭ تەلەراديوكەشەنى» ش ج ق ر م ك باس ديرەكتورى راۋشان قاجىبايەۆا ءتۇسىرىلىم بارىسىنا تولىقتاي باسشىلىق جاسادى.
سونىمەن قاتار Jibek Joly / Silk Way تەلەارناسىنىڭ باسقارۋشى ديرەكتورى ەركەجان كۇنتۋعان دا زور ۇلەسىن قوستى. جالپى، بەينەبايان دەرەكتى فيلمدەر ورتالىعىنىڭ ءتۇسىرىلىم توبى جۇزەگە اسىردى. پروديۋسەرى - الىبەك قۇلامان، رەجيسەرلارى - اقىلبەك شالجانوۆ، الماس ساتكەنوۆ، زۋحراب وتاروۆ، مونتاج رەجيسسەرى - قۋانىش ابيلماجينوۆ.
اۆتور
مارلان جيەمباي
