پرەزيدەنت «قازمۇنايگاز» ۇ ك» ا ق باسقارما ءتوراعاسىنىڭ مىندەتىن اتقارۋشى اسحات حاسەنوۆتى قابىلدادى
استانا. KAZINFORM - پرەزيدەنت قاسىم-جومارت توقايەۆ «قازمۇنايگاز» ۇ ك» ا ق باسقارما ءتوراعاسىنىڭ مىندەتىن اتقارۋشى اسحات حاسەنوۆتى قابىلدادى.
ول كومپانيانىڭ بيىلعى ءبىرىنشى توقساندا اتقارعان وپەراتسيالىق جانە قارجىلىق قىزمەتىنىڭ ناتيجەلەرى تۋرالى ەسەپ بەردى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
«قازمۇنايگازدىڭ» كوپتەگەن نەگىزگى كورسەتكىشتەر بويىنشا بىلتىرعى وسى كەزەڭمەن سالىستىرعاندا وسىمگە قول جەتكىزگەنى جونىندە باياندادى؛
ءىرى ينۆەستيتسيالىق جوبالاردىڭ، سونىڭ ىشىندە جاڭاوزەندە گيبريدتى ەلەكتر ستانتسياسىن جانە اتىراۋ وبلىسىندا قۋاتى 1,25 ميلليون توننا بولاتىن پوليەتيلەن ءوندىرۋ زاۋىتىن سالۋ، مۇناي- حيميا كلاستەرىن دامىتۋ، كاسپي تەڭىزىندەگى قالامقاس- تەڭىز، حازار جانە اۋەزوۆ كەن ورىندارىن يگەرۋ بارىسى جايىندا ايتتى؛
كومپانيانىڭ 2023 -جىلى ىسكە قوسىلعان گاز كەن ورىندارى، سونداي- اق قورلاردى تولتىرۋ جانە مۇناي ءوندىرۋ دەڭگەيىن ساقتاۋ ماقساتىندا جۇرگىزىلىپ جاتقان گەولوگيالىق بارلاۋ جۇمىستارى تۋرالى مالىمەت بەردى. اتاپ ايتقاندا، «قازمۇنايگاز» قىزىلوردا وبلىسىنداعى تورعاي پالەوزوي ۋچاسكەسىندە تەرەڭدىگى 5500 مەتر ۇڭعىما جانە كاسپي تەڭىزىندەگى اباي ۋچاسكەسىندە بۇرعىلاۋ جۇمىستارىن جۇرگىزۋدى كوزدەيدى؛
الەۋمەتتىك جوبالاردىڭ جۇزەگە اسىرىلۋى جانە كومپانيانىڭ سۋ تاسقىنىنا قارسى ءىس-شارالارعا قاتىستى اتقارعان جۇمىستارى تۋرالى ايتتى.
قاسىم- جومارت توقايەۆ گەولوگيالىق بارلاۋ، مۇناي- گاز حيمياسى سالالارىنداعى جوبالارعا ءىرى ينۆەستورلاردى تارتۋ جونىندە ءبىرقاتار تاپسىرما بەردى. سونداي-اق وتاندىق مۇناي وڭدەۋ زاۋىتتارىنىڭ ۇزدىكسىز جۇمىسىن قامتاماسىز ەتۋ قاجەت ەكەنىنە ەرەكشە نازار اۋداردى.
