پرەزيدەنت قازاقتىڭ ءانۇرانىن ايتىپ جۇرگەن ديماشتىڭ شەتەلدىك جانكۇيەرلەرى جايلى: ونەردىڭ قۇدىرەتى دەگەنىمىز -وسى

استانا. KAZINFORM - مەملەكەت تالانتتى جاستارعا ءاردايىم جان-جاقتى قولداۋ كورسەتەدى. بۇل تۋرالى بۇگىن اقوردادا مادەنيەت جانە ونەر قىزمەتكەرلەرىن كاسىبي مەرەكەلەرىمەن قۇتتىقتاعان مەملەكەت باسشىسى قاسىم-جومارت توقايەۆ ايتتى.

«اعا بۋىننىڭ ونەردەگى جولىن قازىرگى جاستارىمىز لايىقتى جالعاستىرىپ كەلەدى. وسى ساباقتاستىقتى ساقتاۋ وتە ماڭىزدى. حالقىمىز «ەل ءىشى - ونەر كەنىشى» دەگەن. بۇگىندە كوپتەگەن ۇل- قىزدارىمىز ەرەكشە دارىنىمەن بۇكىل الەمدى تاڭ قالدىرۋدا. ءتىپتى، قازاق فونەمەنى دەگەن ۇعىم پايدا بولدى. ديماشتىڭ بىرەگەي ونەرىنە ءتانتى بولعان ءتۇرلى ەلدىڭ ازاماتتارى قازاقستاننىڭ ءانۇرانىن ايتىپ، كوك تۋىن جەلبىرەتىپ ءجۇر. ونەردىڭ قۇدىرەتى دەگەنىمىز دە وسى»- دەدى قاسىم- جومارت توقايەۆ.

مەملەكەت باسشىسى شىن مانىندە ونەر ادامىنىڭ باستى ميسسياسى حالىقتىڭ رۋحىن كوتەرۋ ەكەندىگىن باسا ايتتى.

«ال رۋحى بيىك، مادەنيەتى جوعارى ەل كەز كەلگەن بەلەستى باعىندىرا الادى. سوندىقتان مەملەكەت تالانتتى جاستارعا ءاردايىم جان- جاقتى قولداۋ كورسەتەدى»، - دەدى پرەزيدەنت.