پرەزيدەنت: قازاقستاندىقتاردىڭ قارىزعا بەلشەدەن باتقانىنا قاتتى الاڭدايمىن
پرەزيدەنت قاسىم-جومارت توقايەۆ سۇحباتىندا نەسيە نارىعىن رەتتەۋ ساياساتى قالاي وزگەرەتىنىن ايتتى، دەپ حابارلايدى Kazinform.
«مەن ازاماتتارىمىزدىڭ قارىزعا بەلشەدەن باتقانىنا قاتتى الاڭدايمىن. سەبەبى، بۇل ماسەلە جۇرتتىڭ الەۋمەتتىك جاعدايىنا جانە ەلىمىزدەگى قارجى جۇيەسىنىڭ تۇراقتىلىعىنا تىكەلەي اسەر ەتەدى. مەن 2019 -جىلى مەملەكەت باسشىسى رەتىندە قول قويعان العاشقى قۇجاتتىڭ ءبىرى قيىن جاعدايعا تاپ بولعان ازاماتتاردىڭ بورىشىن ازايتۋ تۋرالى جارلىق ەدى. سول ۋاقىتتا 500 مىڭ ادامنىڭ كەپىلسىز العان نەسيەسى كەشىرىلدى. بۇل بىررەتتىك شارا بولاتىن. ال 2023 -جىلى جەكە تۇلعالاردىڭ بانكروتتىعى تۋرالى زاڭ كۇشىنە ەندى. مۇنىڭ ءبارى ماسەلەنىڭ ۋشىعىپ كەتپەۋىنە ىقپال ەتتى. وسى جاعدايدى تۇبەگەيلى وزگەرتۋ ءۇشىن بىلتىرعى جولداۋىمدا ۇكىمەتكە تىڭ شارالاردى قولعا الۋدى تاپسىردىم.
نەگىزىنەن، بۇل جاعدايعا جۇرتتىڭ قارجىلىق ساۋاتتىلىعىنىڭ تومەندىگى سەبەپ بولىپ وتىر. ەكىنشى جاعىنان، تۇتىنۋ نەسيەسىن بەرۋ ءتارتىبىن جانە كوللەكتور ۇيىمدارىنىڭ قىزمەتىن قاتاڭ رەتتەۋ كەرەك»، - دەدى پرەزيدەنت.
مەملەكەت باسشىسى كەيىنگى جىلدارى بانكتەر مەن ميكروكرەديت ۇيىمدارىنا قويىلاتىن تۇتىنۋ نەسيەسى كاپيتالىنىڭ كولەمىنە قاتىستى تالاپتار بەس ەسە كۇشەيتىلگەنىن ەسكە سالعان.
«تولەۋ مەرزىمى ءوتىپ كەتكەن بەرەشەگى بار ادامدارعا نەسيە بەرۋگە تىيىم سالىندى. سونداي-اق قارىزىن ۋاقتىلى وتەي الماعان بورىشكەرگە 90 كۇننەن ءارى ايىپپۇل سالۋعا بولمايدى. كوللەكتور اگەنتتىكتەرىنە تۇراقتى تەكسەرۋ جۇرگىزىلەدى.
بورىشكەرلەر قۇقىعىن قورعاۋ ءۇشىن نەسيە بەرۋ تۋرالى زاڭناماعا ەنگىزىلەتىن تۇزەتۋلەر ازىرلەندى. بۇل وزگەرىستەر بانكتەرگە، ميكروكرەديت ۇيىمدارىنا جانە كوللەكتور اگەنتتىكتەرىنە تالاپتى ودان دا كۇشەيتە تۇسەدى. نەسيەلەردى كوللەكتور كومپانيالارىنا ساتۋدى شەكتەۋ ۇسىنىلادى. كوللەكتور كومپانيالارى قارىزدى وزىنە العان سوڭ ماسەلەنى رەتتەپ كورۋگە مىندەتتى بولادى. بانك ومبۋدسمەنىنىڭ وكىلەتتىگى دە كەڭەيتىلەدى. قازىر بۇل قۇجاتتى ءماجىلىس دەپۋتاتتارى قاراپ جاتىر. مەن بۇل باستامانى قولداۋعا دايىنمىن»، - دەدى قاسىم-جومارت توقايەۆ.
