پرەزيدەنت قازاقستاندىقتارعا جانە تىلەۋلەستىك تانىتقان شەت مەملەكەت باسشىلارىنا العىس ايتتى
استانا. KAZINFORM - پرەزيدەنت قاسىم-جومارت توقايەۆ سۋ تاسقىنىنا قارسى كۇرەستە كورسەتكەن قولداۋى مەن كومەگى ءۇشىن قازاقستاندىقتارعا جانە شەت مەملەكەتتەردىڭ باسشىلارىنا ريزاشىلىعىن ءبىلدىردى.
«ەلىمىزدىڭ ءبىرقاتار وڭىرىندە تابيعي اپات ورىن العان ساتتەن بەرى مەنىڭ اتىما دوستاس مەملەكەتتەردىڭ باسشىلارىنان جىلى لەبىزدەرى مەن كومەك كورسەتۋ جونىندە ۇسىنىستارى جازىلعان حاتتار كەلىپ ءتۇسىپ جاتىر. قازاقستان جويقىن سۋ تاسقىنى كەزىندە جاردەم بەرۋگە دايىن ەكەنىن بىلدىرگەنى ءۇشىن دوستاس ەلدەرگە شىن جۇرەكتەن العىس ايتادى. مەنىڭ تاپسىرمام بويىنشا پرەمەر-مينيستر باستاعان رەسپۋبليكالىق شتاب توتەنشە جاعدايدىڭ سالدارىن بارىنشا ازايتۋ ءۇشىن پارمەندى شارالار قابىلداپ جاتىر. زارداپ شەككەن بارلىق ازاماتقا قاجەتتى كومەك كورسەتىلۋدە. ولاردىڭ بۇكىل شىعىندارى وتەلەدى» دەپ جازدى مەملەكەت باسشىسى Instagram پاراقشاسىندا.
ونىڭ ايتۋىنشا، ءبىر دە ءبىر ادام نازاردان تىس قالمايدى.
«ونى جۋىردا وتانداستارىما ارنالعان ۇندەۋىمدە ايتتىم. اپاتقا قارسى كۇرەس جالعاسۋدا. قيىن-قىستاۋ كەزدە حالقىمىز ءوزىن تاعى دا ەڭ جاقسى قىرىنان تانىتىپ، بىرلىك پەن توزىمدىلىكتىڭ ۇلگىسىن كورسەتكەنى قۋانتادى. قازاقستان ازاماتتارىنا شىن جۇرەكتەن العىس ايتامىن!» دەدى قاسىم-جومارت توقايەۆ.
