پرەزيدەنت قازاقستان-سينگاپۋر رەكتورلارىنىڭ «عىلىم مەن جوعارى ءبىلىم سالاسىنداعى ارىپتەستىكتىڭ جاڭا شىڭى» اتتى فورۋمىنا قاتىستى

سينگاپۋر. KAZINFORM - قاسىم-جومارت توقايەۆ فورۋم قاتىسۋشىلارىنا ءىلتيپات بىلدىرە وتىرىپ، ءبىلىم مەن عىلىمدى دامىتۋ ەلىمىزدەگى مەملەكەتتىك ساياساتتىڭ نەگىزگى باسىمدىعى سانالاتىنىن اتاپ ءوتتى.

- بۇگىنگى فورۋمنىڭ ەكى ەل ىنتىماقتاستىعى ءۇشىن ماڭىزى زور. بۇل شارا قازاقستان مەن سينگاپۋردىڭ ءبىلىم جانە عىلىمي-زەرتتەۋ سالالارىنداعى ىقپالداستىعىن بۇدان دا جوعارى دەڭگەيگە شىعارۋدى كوزدەيدى. كەشە سينگاپۋردىڭ پرەزيدەنتىمەن جانە پرەمەر-مينيسترىمەن عىلىم، ءبىلىم، حالىقارالىق بايلانىستار سياقتى ەكىجاقتى ىنتىماقتاستىقتىڭ كەڭ اۋقىمدى ماسەلەلەرى بويىنشا وتە مازمۇندى كەلىسسوزدەر جۇرگىزدىم. قازاقستاننىڭ بارىنشا اشىق، تۇراقتى نارىقتىق ەكونوميكاعا كوشۋى قارقىندى جانە ورنىقتى ءبىلىم بەرۋ ستاندارتتارى مەن سيفرلىق ترانسفورماتسيانى قاجەت ەتەدى، - دەدى مەملەكەت باسشىسى.

قاسىم-جومارت توقايەۆ قازاقستاندا شەتەلدىك جەتەكشى ۋنيۆەرسيتەتتەردىڭ فيليالدارىن اشۋ، حالىقارالىق ينستيتۋتتارمەن بىرلەسىپ ۇدايى زەرتتەۋ جۇمىستارىن جۇرگىزۋ ءۇشىن ەلىمىزگە دايەكتى ءتاسىل قاجەت ەكەنىن ايتتى.

- سوڭعى بىرنەشە جىلدا ءبىز بەدەلدى 19 ۋنيۆەرسيتەتپەن ستراتەگيالىق اليانس قۇردىق. ا ق ش، ۇلى بريتانيا، رەسەي جانە گەرمانيا ۋنيۆەرسيتەتتەرى ەلىمىزدە ءوز فيليالدارىن اشتى. سونداي-اق قىتاي، تۇركيا، يتاليا جانە جانە باسقا دا مەملەكەتتەردىڭ ۋنيۆەرسيتەتتەرى قازاقستانعا قىزىعۋشىلىق تانىتىپ وتىر، - دەدى پرەزيدەنت.

قاسىم-جومارت توقايەۆ كەشە قازاقستان مەن سينگاپۋردىڭ ءتيىستى ۆەدومستۆولارى اراسىندا جوعارى ءبىلىم بەرۋ سالاسىنداعى ىنتىماقتاستىق تۋرالى مەموراندۋمعا قول قويىلعانىن ايتتى.

- بۇل ديناميكا باسقا دا ءبىرقاتار قۇجاتتى قابىلداۋ، سونىڭ ىشىندە نانيان تەحنولوگيالىق ۋنيۆەرسيتەتىمەن ءوزارا تۇسىنىستىك تۋرالى مەموراندۋمعا قول قويۋ ارقىلى جالعاسادى. بۇل مەموراندۋم قازاقستان ءۇشىن ماڭىزى زور سۋ رەسۋرستارىن باسقارۋ سالاسىنداعى ىنتىماقتاستىققا باعىتتالعان. سۋ - اۋىل شارۋاشىلىعىنان ونەركاسىپكە، دەنساۋلىق ساقتاۋدان قورشاعان ورتاعا دەيىنگى ءومىرىمىزدىڭ بارلىق اسپەكتىسىنە اسەر ەتەتىن وتە ماڭىزدى رەسۋرس. سۋ رەسۋرستارىن ءتيىمدى باسقارۋدىڭ ورنىقتى دامۋ مەن ەكونوميكالىق تۇراقتىلىق ءۇشىن ءمانى زور، - دەدى قاسىم-جومارت توقايەۆ.

مەملەكەت باسشىسى قازاقستاننىڭ «بولاشاق» باعدارلاماسى ارقىلى سينگاپۋرعا زەرتتەۋشىلەر مەن عالىمداردى جىبەرۋگە نيەتتى ەكەنىن ايتتى. ونىڭ ايتۋىنشا، اتالعان باعدارلاما جۇزەگە اسىرىلا باستاعاننان بەرى 12 مىڭنان استام قازاقستاندىق ستۋدەنت الەمنىڭ ۇزدىك ۋنيۆەرسيتەتتەرىندە ءبىلىم الۋ مۇمكىندىگىنە يە بولدى. ونىڭ ىشىندە 72 وتانداسىمىز سينگاپۋردا وقىعان.

- ءالى دە كوپتەگەن قازاقستاندىق ستۋدەنت سىزدەردىڭ عاجاپ ەلىڭىزدە تاجىريبە الماسۋ، ءبىلىم الۋ مۇمكىندىگىنە يە بولارىنا سەنىمدىمىن. جىل سايىن ءبىز زەرتتەۋ جۇمىستارىن جۇرگىزۋگە 500 ستيپەنديا بولەمىز. سينگاپۋرعا كەلەتىن قازاقستاندىق عالىمدار سانىنىڭ كوبەيە تۇسكەنىن قالايمىز. ءبىلىم مەن عىلىم - پروگرەسس پەن يننوۆاتسيانىڭ نەگىزى. وسى سالالارعا كوڭىل بولە وتىرىپ، ءبىز ەلىمىزدىڭ بولاشاعىنا ينۆەستيتسيا سالامىز. سينگاپۋرمەن اراداعى سەرىكتەستىك حالىقارالىق ىنتىماقتاستىقتىڭ دامۋعا جانە حالىقتارىمىز ءۇشىن مۇمكىندىكتەرگە جول اشۋعا ىقپال ەتەتىنىن كورسەتەدى، - دەدى قاسىم-جومارت توقايەۆ.

فورۋمدا سينگاپۋردىڭ ءبىلىم ءمينيسترى مۇحاممەد ماليكي وسمان جانە سينگاپۋر ۇلتتىق ۋنيۆەرسيتەتىنىڭ پرەزيدەنتى، پروفەسسور تان ەنگ چيە ءسوز سويلەدى.

شاراعا قازاقستان مەن سينگاپۋردىڭ جوعارى وقۋ ورىندارى مەن عىلىمي ورتالىقتارىنىڭ 150 دەن استام وكىلى قاتىستى.