پرەزيدەنت قازاقستان مەن رەسەي بىرلەسىپ اتاپ وتەتىن اتاۋلى داتالاردى ايتتى
استانا. KAZINFORM - قازاقستان مەن رەسەي كەلەسى جىلى ءبىرقاتار اتاۋلى كۇنگە وراي مەرەكەلىك ءىس-شارالار وتكىزەدى. بۇل تۋرالى اقوردادا رەسەي پرەزيدەنتى ۆلاديمير پۋتينمەن كەلىسسوزدەردىڭ قورىتىندىسىنا وراي وتكەن بريفينگتە مەملەكەت باسشىسى قاسىم-جومارت توقايەۆ ايتتى.
«2025-جىلعا كوپ شارۋا بار. وتە كوپ بىرلەسكەن جوبانى جۇزەگە اسىرۋىمىز قاجەت. ول ەلىمىزدىڭ ازاماتتارىنا دا، بيزنەسكە دە ايتارلىقتاي پايدا اكەلەرىنە سەنىمدىمىن. كەلەسى جىلدىڭ قاڭتار ايىندا نەگىزگى مەملەكەتارالىق قۇجاتتاردىڭ بىرىنە - قازاق-رەسەي مەملەكەتتىك شەكاراسى تۋرالى شارتقا 20 جىل تولادى. 2025-جىلى ءبىزدى ۇلكەن مەرەيتويلار، ۇلى جەڭىستىڭ 80 جىلدىعى جانە بايقوڭىر عارىش ايلاعىنىڭ 70 جىلدىعى كۇتىپ تۇر. ءبىز ەلدەرىمىزدە وسى اتاۋلى كۇندەردىڭ بارلىعىنا وراي مەرەكەلىك ءىس-شارالار وتكىزۋگە كەلىستىك»، - دەدى مەملەكەت باسشىسى.
قاسىم-جومارت توقايەۆ ەكىجاقتى كۇنتارتىبى ۇنەمى ناقتى باستامالارمەن جانە جاڭا قىزىقتى جوبالارمەن تولىقتىرىلىپ وتىراتىندىعىن ايتتى.
«ءسوزىمدى قورىتىندىلاي كەلە، قازاقستان مەن رەسەي حالىقتارىمىزدىڭ، اسىرەسە وسكەلەڭ ۇرپاقتىڭ ىلگەرىلەۋى مەن ءال-اۋقاتىنىڭ نەگىزىن قالاي وتىرىپ، ستراتەگيالىق ارىپتەستىكتى نىعايتۋ جولىمەن ءاردايىم ءجۇرىپ كەلە جاتقانىن تاعى دا اتاپ وتكىم كەلەدى. بۇگىنگى ءىس-شارالاردىڭ وڭ ناتيجەلەرى ءبىزدىڭ وداقتاستىق قاتىناستارىمىزدى ساپالى جاڭا دەڭگەيگە شىعارۋعا مۇمكىندىك بەرەتىنىنە سەنىمدىمىن»، - دەدى پرەزيدەنت.
