پرەزيدەنت قازاقستان حالقىن ناۋرىز مەيرامىمەن قۇتتىقتادى
الماتى. KAZINFORM - الماتى قالاسىنا جۇمىس ساپارىمەن بارعان قاسىم-جومارت توقايەۆ «استانا» الاڭىندا ءوتىپ جاتقان مەرەكەلىك ءىس-شارادا قازاقستان حالقىن ۇلىستىڭ ۇلى كۇنىمەن قۇتتىقتادى.
مەملەكەت باسشىسى ءوز سوزىندە ءتول جاڭا جىلىمىز ناۋرىز مەيرامىن اتا داستۇرىمىزگە سايكەس بارشا جۇرتىمىزدىڭ ءبىر ەل، ءبىر حالىق بولىپ قارسى الاتىنى جونىندە ايتتى.
- بابالارىمىز ەجەلگى زاماننان بەرى ۇلىس كۇنىن جىل باسى رەتىندە اتاپ وتكەن. ءقازىر ءاز ناۋرىز كۇللى حالىققا ورتاق جالپىۇلتتىق مەرەكەگە اينالدى. ونى ۇلتىنا، دىنىنە قاراماستان بارشا جۇرتىمىز ەرەكشە كۇتەدى، بىرگە اتاپ وتەدى. دانا حالقىمىز «جاقسى ءسوز - جارىم ىرىس» دەپ بەكەر ايتپاعان. جاڭا جىلدى جاقسى نيەتپەن، پايدالى ىسپەن باستاۋ - تالايدان قالىپتاسقان ءداستۇر. بۇل كۇنى قوناقجاي جۇرتىمىز اق داستارقان جايىپ، ءبىر-بىرىنە اقجارما تىلەكتەرىن ايتادى. بۇلاقتىڭ كوزىن اشىپ، تال ەگەدى، تازالىققا باسا ءمان بەرەدى. ناۋرىز مەرەكەسىندە حالقىمىزدىڭ اسىل قاسيەتتەرى مەن قۇندىلىقتارى تۇگەل كورىنىس تاپقان. بيىل ۇلىستىڭ ۇلى كۇنى رامازان ايىمەن تۇسپا- تۇس كەلىپ وتىر. قازاق جەرىندەگى ءدىن مەن ءداستۇردىڭ ۇيلەسىمى ءدال وسى كەزدە ايقىن كورىنەدى، - دەدى قاسىم-جومارت توقايەۆ.
پرەزيدەنت بيىلدان باستاپ ناۋرىز مەيرامى 10 كۇن بويى اتالىپ ءوتىپ جاتقانىنا توقتالدى. ناۋرىزناماعا سايكەس، بۇگىن ەلىمىزدە «ىنتىماق» كۇنى.
- بىرلىك پەن ىنتىماق - ەلىمىزدىڭ باستى قۇندىلىقتارىنىڭ ءبىرى. ءبىز جاناشىرلىق، تىلەۋلەستىك سياقتى اسىل قاسيەتتەردى دارىپتەۋىمىز قاجەت. ەلىمىزدىڭ بىرلىگى مەن تاتۋلىعى ءاردايىم بەكەم بولسا، ەلدىگىمىزدىڭ تۇعىرى ماڭگى بولادى. مەن بۇعان كامىل سەنەمىن، - دەدى مەملەكەت باسشىسى.
قاسىم-جومارت توقايەۆ جاڭارۋ مەن جاڭعىرۋدىڭ سيمۆولىنا اينالعان ناۋرىز مەيرامى بيىل قوعام دامۋىنىڭ جاڭا كەزەڭىنە قادام باسقانىمىزدى بىلدىرەتىنىن اتاپ ءوتىپ، بارلىق ازاماتتىڭ جۇرەگىنەن ورىن الاتىن ىرگەلى قۇندىلىقتاردىڭ ايقىندالعانىنا نازار اۋداردى.
- ەلىمىزدىڭ الدىندا بيىك ماقسات تۇر. بۇل - ادىلەتتى قازاقستاندى قۇرۋ. ءبىز ادال ەڭبەك ەتىپ، ادال تابىسقا جەتە الاتىن ءادىل قوعام ورناتۋىمىز كەرەك. مۇنداي قوعامدى ادال ازاماتتار قالىپتاستىرادى. ءبىر سوزبەن ايتساق، ادىلدىك پەن ادالدىق - ءاردايىم قاتار جۇرەتىن ەگىز ۇعىم. سوندىقتان ءبىز قۇرىپ جاتقان قوعامدا بارشاعا بىردەي مۇمكىندىك بەرىلەدى. ادىلەتتى مەملەكەت - بۇل زاڭ مەن ءتارتىپ ۇستەمدىگى. وزىق مەملەكەت بولۋ ءۇشىن ءبارىمىز تەك جارقىن بولاشاققا سەنىممەن قاراۋىمىز كەرەك. ءبىزدىڭ ءۇمىتىمىز - جاستار. قازاقستاننىڭ كەلەشەگى سىزدەردىڭ قولدارىڭىزدا. بەلسەندى، ساناسى سەرگەك، ويى ۇشقىر، ادال، كوزى اشىق جاستارعا ءبىز ءاردايىم قولداۋ كورسەتەمىز، - دەدى پرەزيدەنت.
مەملەكەت باسشىسى قۇتتىقتاۋ سوزىندە ەگەمەندىگىمىزدىڭ التىن بەسىگى بولعان الماتىنى ەلىمىزدىڭ رۋحاني، عىلىمي جانە ەكونوميكالىق ورتالىعى دەپ اتادى.
- الماتى بۇكىل قازاقستاننىڭ وركەندەۋىنە زور ىقپال ەتەدى. سوندىقتان مەن الماتىنىڭ دامۋىن، قالا تۇرعىندارىنىڭ تىنىس-تىرشىلىگىن ايرىقشا نازاردا ۇستايمىن. اسەم الماتىمىز بولاشاقتا بۇدان دا كوركەيە بەرەتىنىنە سەنەمىن، - دەدى قاسىم-جومارت توقايەۆ.
