پرەزيدەنت: قازاقستان ازاماتتىعىن جانە قانداس مارتەبەسىن الۋ ءتارتىبى جەڭىلدەتىلدى

 مەملەكەت باسشىسى «وتانداستار» فورۋمىنا قاتىسۋشىلارعا ۇندەۋ جولدادى. Kazinform بۇل تۋرالى اقوردانىڭ باسپا ءسوز قىزمەتىنە سىلتەمە جاساپ حابارلايدى.

قاسىم- جومارت توقايەۆ جيىنعا قاتىسۋشىلاردى «وتانداستار» فورۋمىنىڭ اشىلۋىمەن قۇتتىقتادى.

«بۇل - حالقىمىز ءۇشىن ايرىقشا ءمانى بار باسقوسۋ. قازاقتا «كەلىسىپ پىشكەن تون كەلتە بولماس» دەگەن ءسوز بار. اتا- بابامىز قاشاندا ەلدىك ماسەلەلەردى القالى جيىندا اقىلداسىپ شەشكەن. وسى ورايدا شەتەلدەگى قازاقتارمەن جان- جاقتى بايلانىستى نىعايتۋ، ۇلتتىق قۇندىلىقتاردى دارىپتەۋ جانە باسقا دا وزەكتى ماسەلەلەردى وزدەرىڭىزبەن بىرگە تالقىلاۋدىڭ ماڭىزى زور. قاي مەملەكەتتى مەكەن ەتسە دە، قازاقتىڭ ءبىر عانا تاريحي وتانى بار، ول - قازاقستان. سوندىقتان ءبىز شەتەلدە تۇراتىن باۋىرلارىمىزدى قولداۋعا قاشاندا باسا ءمان بەرەمىز. ولاردىڭ اتاجۇرتقا قونىس اۋدارۋىنا بارلىق جاعداي جاسالعان. قازاقستان ازاماتتىعىن جانە قانداس مارتەبەسىن الۋ ءتارتىبى جەڭىلدەتىلدى. شەتەلدەگى قازاق كاسىپكەرلەرى ءۇشىن «اتا جولى» كارتاسى ەنگىزىلدى. باسقا دا ماڭىزدى جۇمىستار اتقارىلۋدا. قانداستارمەن قارىم- قاتىناستى دامىتا تۇسۋگە باعىتتالعان وسىنداي شارالار جالعاسا بەرەدى»، - دەدى پرەزيدەنت.

قاسىم- جومارت توقايەۆ جيىنعا الەمنىڭ ءار تۇكپىرىنەن ارنايى كەلگەن قانداستارىمىز بەن مارتەبەلى مەيماندارعا العىس ايتىپ، اتالعان باسقوسۋدا الىستاعى اعايىنمەن بايلانىستى نىعايتۋعا سەپتىگىن تيگىزەتىن ساليقالى وي، سالماقتى پىكىرلەر ايتىلاتىنىنا سەنىم ءبىلدىردى.

سونداي- اق مەملەكەت باسشىسى جيىن قاتىسۋشىلارىنا زور دەنساۋلىق، ب ا ق- بەرەكە تىلەدى.