پرەزيدەنت «QazaqGaz» باسشىسىن قابىلدادى
استانا. KAZINFORM - مەملەكەت باسشىسى «QazaqGaz» ۇ ك» ا ق باسقارما ءتوراعاسى سانجار جاركەشوۆتى قابىلدادى. پرەزيدەنتكە ۇلتتىق كومپانيانىڭ بىلتىرعى اتقارعان جۇمىسىنىڭ ەسەبى بەرىلىپ، الداعى كەزەڭگە ارنالعان جوسپارى تانىستىرىلدى، دەپ حابارلايدى اقوردانىڭ باسپا ءسوز قىزمەتى.
قاسىم- جومارت توقايەۆقا اۋقىمدى ينفراقۇرىلىمدىق جوبالاردىڭ ىسكە اسىرىلۋ بارىسى، قاشاعان گازىن وڭدەۋدىڭ جاڭا باعىتتارى، سونداي- اق گاز سالاسىنا 12 ميلليارد دوللار كولەمىندە ينۆەستيتسيا تارتۋ ماسەلەسى جونىندە باياندالدى.
سانجار جاركەشوۆتىڭ ايتۋىنشا، «QazaqGaz» كومپانيالار توبى وڭىرلەردى دامىتۋ ءۇشىن الەۋمەتتىك- ەكونوميكالىق ماڭىزى بار ءىرى گاز قۇبىرلارىن تارتىپ، ىسكە قوسقان. ولاردىڭ قۇنى 400 ميلليارد تەڭگەدەن اسادى.
مەملەكەت باسشىسىنا ەلىمىزدى گازبەن قامتۋ جۇمىستارى تۋرالى مالىمەت بەرىلدى. اتاپ ايتقاندا، 11 وڭىردەگى 112 ەلدى مەكەن گازعا قوسىلدى. ناتيجەسىندە قوسىمشا 213 مىڭ تۇرعىن تابيعي گازبەن قامتاماسىز ەتىلدى. كومپانيا بىلتىر ىشكى نارىقتاعى گاز باعاسىن سۋبسيديالاۋعا 175 ميلليارد تەڭگە ءبولدى. سونىمەن قاتار «QazaqGaz» ۇ ك» اكتسيونەرلىك قوعامى تابيعي گازدى ەكسپورتتاۋ جانە تاسىمالداۋ جونىندەگى مىندەتتەمەلەرىن تولىق ورىنداپ وتىر.
بۇدان بولەك، پرەزيدەنتكە جاڭا «اناباي» گاز كەن ورنىن پايدالانۋعا بەرۋ، سونداي- اق گازدىڭ رەسۋرستىق بازاسىن دامىتۋ جۇمىستارى جونىندە اقپارات بەرىلدى. قابىلدانعان شارالاردىڭ ارقاسىندا ەلىمىزدىڭ ىشكى نارىعىنا گاز جەتكىزۋ كولەمى 19 پايىزعا ۇلعايدى.
قاسىم-جومارت توقايەۆقا بەرىلگەن مالىمەتكە سايكەس ۇلتتىق كومپانيا اۋا رايى كۇرت سۋىتىپ، گاز تاسىمالداۋ جۇيەسىنە شەكتەن تىس جۇكتەمە تۇسكەن كەزدە ىشكى نارىقتىڭ سۇرانىسىن تولىقتاي وتەپ، تۇرعىنداردى كوگىلدىر وتىنمەن ۇزدىكسىز قامتاماسىز ەتكەن.
كەزدەسۋ سوڭىندا مەملەكەت باسشىسى گاز سالاسىن كەشەندى تۇردە دامىتۋعا، سونىڭ ىشىندە ىشكى نارىقتى گازبەن تۇراقتى تۇردە قامتۋعا، رەسۋرستىق بازانى كەڭەيتۋگە، اتالعان سالانىڭ وزەكتى ماسەلەلەرىن شەشۋگە جانە ونىڭ ينۆەستيتسيالىق تارتىمدىلىعىن جاقسارتۋعا باعىتتالعان ءبىرقاتار تاپسىرما بەردى.
