پرەزيدەنت قازاق-ارميان ىنتىماقتاستىعىنىڭ بەلسەندى دامىعان باعىتتارى تۋرالى ايتتى

قازاقستان پرەزيدەنتى قاسىم-جومارت توقايەۆ «ارمەنپرەسس» اقپارات اگەنتتىگىنە بەرگەن سۇحباتىندا ارمەنيا مەن قازاقستان اراسىنداعى مادەني جانە گۋمانيتارلىق سالالارداعى ىنتىماقتاستىقتىڭ بۇگىنى مەن كەلەشەگىن دە اتاپ ءوتتى، دەپ حابارلايدى Egemen.kz.

پرەزيدەنت ەكى ەلدىڭ اراسىندا التىن كوپىر بولعان رۋحاني-مادەني بايلانىستار قازاق-ارميان ىنتىماقتاستىعىنىڭ قارقىندى دامىعان باعىتىنىڭ ءبىرى ەكەنىن اتاپ ءوتتى.

مەملەكەت باسشىسىنىڭ ايتۋىنشا 2006-جىلعى 6-قاراشاداعى مادەنيەت سالاسىنداعى ىنتىماقتاستىق تۋرالى ۇكىمەتارالىق كەلىسىم - بازالىق قۇجات. بۇدان باسقا، سالالىق مينيسترلىكتەر مەن ۆەدومستۆولار اراسىندا مەموراندۋمدار مەن ىنتىماقتاستىق باعدارلامالارىنا قول قويىلدى، ولاردىڭ نەگىزىندە مادەني-ءبىلىم بەرۋ جانە عىلىمي-زەرتتەۋ الماسۋدىڭ ءتۇرلى باعىتتارى بويىنشا جۇيەلى جۇمىس جۇرگىزىلىپ جاتىر.

«قازاقستان ارمەنياداعى قازاق حالقى مۇراسىنىڭ قۇرمەتتەلۋىن جوعارى باعالايتىنىن ەرەكشە اتاپ وتكىم كەلەدى. ەريەۆاندا جامبىل جانە الماتى ەسىمدى كوشەلەر بار ەكەنىن بىلەمىن. 2010-جىلدان باستاپ ەريەۆان مەملەكەتتىك ۋنيۆەرسيتەتىنىڭ تۇركولوگيا كافەدراسىندا اباي اتىنداعى قازاق ءتىلى، مادەنيەت جانە تاريح ورتالىعى جۇمىس ىستەيدى. ءوز كەزەگىندە ەلوردادا ارام حاچاتۋريان اتىنداعى كوشە، الماتىدا ارميانسكايا كوشەسى اشىلدى. بىرلەسكەن جوسپاردا ءبىز حالقىمىزدىڭ ۇلى ۇلدارى قۇرمەتىنە جاڭا كوشەلەر اشۋدى قاراستىرامىز. ارينە، مۇنداي وقيعالاردىڭ تەرەڭ ماعىناسى بار جانە ولاردى ەكى ەلدىڭ عىلىمي جانە شىعارماشىلىق قوعامداستىقتارى زور ىقىلاسپەن قابىلدايدى»، دەدى پرەزيدەنت.

مەملەكەت باسشىسىنىڭ سوزىنشە 2023-2025-جىلدارعا ارنالعان مادەنيەت سالاسىنداعى باعدارلاما شەڭبەرىندە مۋزىكا جانە حورەوگرافيا ونەرى، مۇراجاي جانە كىتاپحانا ءىسى، كينو جانە تاريحي- مادەني مۇرا سالالارىنداعى ىنتىماقتاستىقتى نىعايتۋ كوزدەلگەن.

«ءبىزدىڭ ەلدەرىمىز ءداستۇرلى تۇردە ءتۇرلى بىرلەسكەن ءىس-شارالار، سونىڭ ىشىندە فەستيۆالدار، كورمەلەر، كونسەرتتەر مەن تەاترلاندىرىلعان قويىلىمدار وتكىزەدى. 2023-جىلى ەريەۆاندا قازاقستاننىڭ بەلگىلى ءانشىسى ديماش قۇدايبەرگەننىڭ جەكە كونسەرتى، ارمەنياداعى قازاق تەاترى كۇندەرى، الماتىدان م. اۋەزوۆ اتىنداعى قازاق ۇلتتىق تەاترى مەن قوستانايدان كەلگەن وبلىستىق دراما تەاترى ۇجىمىنىڭ گاسترولدەرى ءوتتى. ءوز كەزەگىندە قازاقستاندا كورنەكتى كومپوزيتور جانە ديريجەر ارام حاچاتۋرياننىڭ تۋعانىنا 120 جىل تولۋىنا ارنالعان ارميان ۇجىمدارىنىڭ كونسەرتتەرى ءوتتى»، دەدى قاسىم-جومارت توقايەۆ.

پرەزيدەنت بيىل كۇزدە قازاقستاندا ارمەنيانىڭ مادەنيەت كۇندەرىن وتكىزۋ جوسپارلانىپ وتىرعانىنا توقتالدى. ايتۋلى ءىس-شارادا كورەرمەندەر ارمەنيانىڭ شىعارماشىلىق ومىرىمەن كەڭىنەن تانىسۋ مۇمكىندىگىنە يە بولادى.

«ءبىلىم سالاسىنداعى جانە ەكى ەلدىڭ جاستارى اراسىنداعى بايلانىستاردى نىعايتۋ ءۇشىن دە الەۋەت جەتكىلىكتى.

جاستار ەلدەرىمىزدەگى وڭ وزگەرىستەردىڭ لوكوموتيۆى بولىپ قانا قويمايدى. ەكى مەملەكەت اراسىنداعى ىنتىماقتاستىقتى دوستىق، قۇرمەت جانە ءوزارا تۇسىنىستىك نەگىزىندە ودان ءارى نىعايتۋ - ءدال وسى جاستاردىڭ مىندەتى.

وسىعان بايلانىستى ءبىز ءۇشىن ءبىلىم بەرۋ جانە ستۋدەنتتىك الماسۋلاردى قولداۋ وزەكتى مىندەت بولىپ تابىلادى»، دەدى مەملەكەت باسشىسى.

سونىمەن قاتار، پرەزيدەنت ەكى ەلدىڭ سپورتشىلارى قازاقستان مەن ارمەنيادا وتكىزىلەتىن ءتۇرلى جارىستارعا ۇنەمى قاتىسىپ جۇرگەنىن، ارمەنيانىڭ ۇلتتىق قۇراماسى بيىل قىركۇيەك ايىندا استانادا وتەتىن 5-دۇنيەجۇزىلىك كوشپەندىلەر ويىندارىنا شاقىرىلعانىن اتاپ ءوتتى.

«مەنىڭ ەريەۆانعا الداعى ساپارىم بارىسىندا قازاقستان مەن ارمەنيانىڭ ۋاكىلەتتى مينيسترلىكتەرى دەنە شىنىقتىرۋ جانە سپورت سالاسىنداعى 2024-2026-جىلدارعا ارنالعان ىنتىماقتاستىق باعدارلاماسىنا قول قويادى. مادەني، ستۋدەنتتىك، سپورتتىق دەلەگاتسيالارمەن الماسۋ ءبىزدىڭ حالىقتارىمىزدى جاقىنداستىرۋدىڭ، ازاماتتار اراسىندا بايلانىس پەن دوستىق ورناتۋدىڭ، ءتۋريزمدى دامىتۋدىڭ ماڭىزدى تۇعىرناماسىنا اينالۋى ءتيىس»، دەدى قاسىم-جومارت توقايەۆ.