پرەزيدەنت قاسىم-جومارت توقايەۆ قاتار سىرتقى ىستەر مينيسترىمەن كەلىسسوز جۇرگىزدى
دوحا. KAZINFORM - پرەزيدەنت قاسىم-جومارت توقايەۆ قاتار مەملەكەتىنىڭ پرەمەر- ءمينيسترى - سىرتقى ىستەر ءمينيسترى شەيح مۇحاممەد بەن ابدۋلراحمان ءال تانيمەن كەلىسسوز جۇرگىزدى. بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆ قوناقجايلىق كورسەتكەنى ءۇشىن قاتار مەملەكەتىنىڭ پرەمەر-مينيسترىنە العىس ايتتى. سونىمەن بىرگە قازاقستان مەن قاتار اراسىنداعى قارىم-قاتىناستى جوعارى باعالايتىنىن اتاپ ءوتىپ، بۇگىن قول جەتكىزگەن كەلىسىمدەر سەرىكتەستىكتى جاڭا دەڭگەيگە كوتەرۋگە تىڭ سەرپىن بەرەتىنىنە سەنىم ءبىلدىردى.
پرەزيدەنت قاسىم-جومارت توقايەۆ قاتار سىرتقى ىستەر مينيسترىمەن كەلىسسوز جۇرگىزدى.
«وسى ساپاردى دايىنداۋعا اتسالىسقانىڭىز ءۇشىن سىزگە شىن جۇرەكتەن ريزاشىلىعىمدى بىلدىرگىم كەلەدى. ساپار شىنىمەن ءساتتى بولدى. ءبىزدىڭ قارىم-قاتىناسىمىزعا تىڭ سەرپىن بەرەتىن قۇجاتتار توپتاماسىنا قول قويىلدى. جوعارى مارتەبەلى قاتار امىرىنە ايتقانىمداي، ءبىز ءوزارا بايلانىستاردى ەكى ەل اراسىنداعى ستراتەگيالىق سەرىكتەستىك دەڭگەيىنە كوتەردىك. بۇل وتە ۇلكەن جەتىستىك دەپ سانايمىن. مەن وسىنداي ناتيجەگە قول جەتكىزگەنىمىزگە قۋانىشتىمىن. ءبىراق ءبىز مۇنىمەن شەكتەلىپ قالماي، العا قادام باسىپ، ءوزارا ىنتىماقتاستىقتىڭ جاڭا مۇمكىندىكتەرىن قاراستىرۋىمىز كەرەك»، - دەدى قازاقستان پرەزيدەنتى.
قاسىم-جومارت توقايەۆتىڭ ايتۋىنشا، ەكونوميكالىق بايلانىستار بىرلەسكەن كۇش-جىگەردىڭ نەگىزگى تىرەگىنە اينالۋعا ءتيىس.
